Partia Demokratike ka dal me një draft paralel për reformën në Drejtësi.
Pas mbledhjes së grupit të kësaj partie, Lulzim Basha theksoi se pikërisht ky draft do të jetë bazë e negociatave me PS dhe LSI në procesin e finalizimit të reformës së shumëpritur të drejtësisë. “PD ka draft të konsoliduar që do të përbëjë bazën e negociatave tona. Vizioni ynë është në përputhje me rekomandimet e Komisionit të Venecias”, tha Basha.
Basha kërkoi që të ketë një rakordim politik për miratimin sa shpejt të kësaj reforme.
“Opozita po tregon kredibilitet dhe vullnet për të ecur me reformën. I takonte mazhorancës që të hidhte këto hapa. Në lidhje me arkitekturën e sistemit, Venecia ka thënë se sistemi është i komplikuar dhe ka dyshime, por kanë takuar Xhafajn, i cili i ka siguruar për këtë. Dhe ata kanë thënë që do të jenë dakord me strukturën nëse palët politike bien dakord. Nuk është kaq e lehtë. Arkitektura e sistemit duhet të thjeshtohet për t’i shërbyer qytetarëve. Nëse duam vende pune me rrogë 6 milionë lekë në muaj për politikanët, dakord. Por kjo nuk është reformë në drejtësi”, shpjegoi Basha.
Në lidhje me skandalin e përgjimit, Basha tha prerë: “Kërkojmë transparencë nga ministri i Brendshëm, policia dhe kryeministri. Por ata duan mjegull. Largimi i Tahirit, parakusht për hetimin e këtij skandali”.
