Situata në rajonin juglindor të Turqisë vijon të mbetet mjaft e rënduar teksa gjatë orëve të fundit tetë ushtarë dhe 22 militantë kurdë kanë humbur jetën në luftimet mes tyre.
Zona më problematike paraqitet në afërsi të qytetit Diabakir, në të cilin kanë shpërthyer edhe dy bomba të vendosura nga rebelët që kërkojnë autonominë e rajonit.
Shpërthimi i pari vrau tre persona dhe pati si objektiv një makinë policie ndërkohë që një incidenti i dytë u mori jetën katër rebelëve gjatë momentit që këta të fundit po tenton që të montonin eksplozivin.
Për situatën ka reaguar edhe Presidenti i vendit Rexhep Taip Erdogan, i cili bëri fajtor kurdët dhe militantët e shtetit islamik për situatën e destabilizuar. Ai shtoi se autoritetet do të qëndrojnë të vendosura në misionin e tyre për të luftuar terrorizmin.
Përgjatë muajve të fundit si pasojë e luftimeve kanë humbur jetën 450 oficerë të sigurisë turke si dhe mijëra militantë. Rebelët kurdë që kërkojnë autonominë e rajonit jug-lindor kanë kundërshtuar me metoda mjaft të ashpra ku më kryesoret kanë qenë sulmet me eksplozivë.
Gjatë përplasjeve janë regjistruar edhe viktima nga radhët e qytetarëve të zakonshëm.
Luftimet në këtë rajon janë kritikuar ashpër edhe nga Bashkimi Europian, i cili ka bërë thirrje që Ankaraja të ndryshojë ligjet e terrorizmit.
Megjithatë, zyrtarët turq janë shprehur se këto ligje janë të nevojshme për të ruajtur rendin dhe sigurinë.
