Pjesëmarrja në kupat e Europës dhe qëndrimi në Superligë janë synimet e tjera për këtë fund sezoni. Fitorja e Partizanit mbrëmë në Korçë la të hapur çështjen e titullit, por sot do të luhen takimet e tjera të javës së 35.
Vendi i tretë është një sfidë mes Kukësit dhe Teutës, pasi Tirana nuk shpreson më për pjesëmarrjen në Europa League. Kukësi do të luajë me Tërbunin e rënë në Kategorinë e Parë. Teuta do të presë Laçin që rrezikon ende rënien ashtu si Vllaznia, Flamurtari dhe Bylisi.
Në Ballsh do të luhet një përballje direkte mes Bylisit dhe Flamurtarit, që mund të rezultojë përcaktues për objektivin mbijetesë. Në kryeqytet do të zhvillohet Derbi i Shqipërisë, që vlen vetëm për ekipin shkodran që mund të sigurojë qëndrimin në Superligë. Të gjitha ndeshjet do të nisin në orën 17:30.
