Policia italiane ka shkatërruar një bandë plaçkitësit që ishin kthyer në tmerrin e biznesmenëve në Rimini të Itali. Përvec plackitjeve banda akuzohet edhe për trafik kokaine dhe prostitucion.
Pjesë e bandës ishin edhe dy shqiptarë, një maqedonas, një italian dhe një ukrainas, që janë arrestuar në kuadër të operacionit të koduar “T-MAX”. Mediat italiane japin emrat e shqiptarëve, të cilët janë Fatjon Vata, 20 vjeç dhe Bardhok Sokoli, 21-vjeç.
Sipas hetimeve të policisë italiane që kanë zgjatur mbi një muaj, banda i përdorte paratë e përfituara nga grabitjet për prostitutat si dhe për të blerë kokainë. Shqiptari Fatjon Vata besohet të jetë drejtuesi i bandës, ndërsa Sokoli është kushëriri i tij.
Pjesë e grupit ishte edhe kuzhinieri italian nga Rimini, Gino Alberto Melis, 32-vjeçar. Gjithçka filloi më 20 janar, kur në Rimini u krye një grabitje me armë në një stacion gazi dhe një sërë biznesesh të tjera të vogla. Banda zhvendosej me motorë skuter “Yamaha”.
Zbulimi i tyre erdhi pas vendosjes së një dektori GPS i montuar në motorët “T-Max”.
Një nga grabitjet më spektakolare ishte ajo e realizuar në fund të muajit janar, ku përmes një vrime të vogël ishin arritur të grabiteshin 15 mijë euro në një kafe “Segafredo”.
