Dy sekretare pranë Fakultetit të Shkencave Sociale janë arrestuar pasi kundrejt pagesës kanë pajisur një student me çertifikatën e njohjes së gjuhës angleze.
Arrestimi i tyre ndodhi pas denoncimit të një rasti korruptiv në emisionin “STOP” që ndodhte me provimin e anglishtes, policia ka arrestuar dy persona.
Në pranga kanë rënë, Majlinda Tafaj, 40-vjeçe, banuese në Tiranë, me profesion sekretare pranë Fakultetit të Shkencave Sociale dhe L.M, me detyrë administrator i qendrës “Esol Examinations BULATS” .
Sipas policisë, Majlinda Tafaj është kapur në Rinas, në përpjekje për t’u larguar jashtë vendit. Ajo ka vetëdeklaruar se ka bashkëpunuar me L.M, si dhe ka marrë prej tij vlera monetare (euro) si shpërblim, përfitim personal për studentë që i ka rekomanduar dhe janë pajisur me çertifikatë të “Esol Examinations BULATS”.
Ndalimi i tyre është bërë pasi në datë 10.05.2016 në emisionin investigativ “STOP” në Tv Klan janë transmetuar pamje filmike (audio-video), të regjistruara në ambientet e qendrës “International Studies Insitute” në Tiranë, ku një qytetare që nuk ka fare njohuri në gjuhën angleze, nëpërmjet ndihmës së asistentëve dhe pedagogëve kundrejt pagesës realizon testin dhe në fund siguron çertifikatën e njohjes së gjuhës angleze që përdoret si kriter pranimi në programet e studimit të ciklit të dytë dhe të tretë në institucionet për arsimin e lartë.
Mbi personat e lartpërmendur rëndon akuza për veprat penale “shpërdorimi i detyrës” kryer në bashkëpunim dhe “korrupsioni pasiv në sektorin privat”.
Ndërkohë policia po punon për identifikimin e bashkëpuntorëve të tjerë të përfshirë në këtë veprimtari kriminale. Materialet proceduriale janë referuar në Prokurorinë e Rrethit Gjyqësor Tiranë.
