Sekretarja e Fakultetit të Shkencave Sociale në Tiranë është arrestuar sot nga efektivët e Policisë, pas denoncimit në media si e përfshirë në një skandal me certifikata false të gjuhëve të huaja.
Denoncimi në emisionin “Stop” pak ditë më parë, solli një video e cila tregonte se si një studente e cila nuk kishte njohuri për gjuhën angleze, pajiset me certifikatë nga një qendër kursesh, kundrejt një pagese në euro.
Policia deklaron se nga Seksioni për Korrupsionin pranë Drejtorisë Vendore së Policisë Tiranë u bë ndalimi i një shtetaseje dhe shpallja në kërkim e një shtetasi për veprën penale “Shperdorimi i detyrës” kryer në bashkepunim dhe “Korrupsioni pasiv në sektorin privat”.
Më datë 12.05.2016, u bë ndalimi i shtetases:
– Majlinda Tafaj, 40 vjeçe, banuese në Tiranë, me profesion sekretare pranë Fakultetit të Shkencave Sociale Tiranë
Ndalimi i kësaj shtetaseje është bërë pasi në datë 10.05.2016 në emisionin investigativ “Stop” në Tv Klan janë transmetuar pamje filmike (audio-video) të rregjistruar në ambjentet e qendrës ”International Studies Insitute” në Tiranë ku një shtetase që nuk ka fare njohuri në gjuhën Angleze, nëpërmjet ndihmës së asistenteve dhe petagogëve kundrejtë pagesës, realizon testin dhe në fund siguron çertifikatën e njohjes së gjuhës Angleze që përdoret si kriter pranimi në programet e studimit të ciklit të dytë dhe të tretë në institucionet për arsimin e lartë.
Sipas policisë rezulton, se personat e përfshirë në veprime të jashtëligjshme, korruptive janë shtetasit:
– L.M” me detyrë administrator i qendrës “Esol Examinations BULATS”
– Majlinda Tafaj me detyrë sekretare mësimore në Fakultetin e Shkencave Sociale Tiranë.
Më datë 12.05.2016 shtetasja Majlinda Tafaj është kapur në flagrancë në Pikën e Kalimit Kufitar Rinas në përpjekje për t’u larguar jashtë vendit dhe ka vetdeklaruar se ka bashkëpunuar me shtetasi L.M. dhe ka marrë prej tij vlera monetare (Euro) si shpërblim, përfitim personal për studentë që i ka rekomanduar dhe janë pajisur me çertifikatë të “Esol Examinations BULATS”.
Po punohet për identifikimin e bashkëpuntorëve të tjerë të përfshirë në këtë veprimtari kriminale.
Materialet procedurale janë referuar në Prokurorinë e Rrethit Gjyqësor Tiranë për veprat penale “Shperdorimi i detyrës” kryer në bashkëpunim dhe “Korrupsioni pasiv në sektorin privat”.
