Kreu i Partisë Demokratike, Lulzim Basha e ka akuzuar Kryeministrin se kur ishte në opozitë bëri gjithçka që kishte në dorë për ta mbajtur vendin larg Europës.
Në ditën e Europës, Basha ka thënë se Rama nuk e shef Shqipërinë në Europë pasi ai ka ndërmarrë akte anti-Europiane që nga futja e personave të inkriminuar në administratën shtetërore deri tek pengimi i ligjeve në kohën e Berishës kryeministër.
“Sot po vepron edhe më keq, duke e kthyer vendin pas, me anë të futjes së personave me precedent penalë në zyrat e administratës shtetërore”, tha Basha.
“Sot në ditën e Europës, Rama u shfaq me tërë përmasat e tij si gënjeshtar. Rrena e parë ishte se qeveria e mëparshme paska bllokuar afrimin e vendit me BE-në. Po aplikimi për statusin e vendit kandidat, kur ndodhi? Po heqja e kufirit me vendet Schengen, lëvizja e lirë pa viza, kur ndodhi? Po rekomandimi për statusin kur ndodhi? Po bllokimi i marrjes së statusit të vendit kandidat, për shkak se Rama refuzoi të votonte 3 ligjet, kur ndodhi? Edhe Rames si Roshit nuk i kujtohet e kaluara. Kur ishte në opozitë bëri gjithçka që kishte në dorë për ta mbajtur vendin larg Europës. Sot në pushtet, më keq akoma, e ka kthyer vendin pas”, u shpreh Basha.
Më tej kreu i opozitës vijon duke u shprehur se, “Inkriminimi i politikës dhe zyrave publike, shkatërrimi i zgjedhjeve dhe goditja e votës së lirë, krimi i organizuar, Shqipëria e para në listën e drogës, korrupsioni në çdo degë të qeverisjes, ekonomia në humnerë, vrasja e shpresës dhe eksodi masiv, të gjitha këto janë jo vetëm akte të Ramës kundër popullit të tij, por sidomos akte anti-Europë.
Shqipëria dhe shqiptarët kanë qenë shpesh në udhëkryq. Ka pasur ky vend në historinë e tij pengesa e armiq në rrugëtimin drejt Europës, që kanë dashur ta mbajnë larg aspiratës shekullore. Dje Haxhi Qamili e më pas regjimi komunist, dhe sot Edi Rama. Por nuk ia kanë dalë asnjëherë. Shqiptarët dinë të zgjedhin, dhe zgjedhja është e qartë. Vetëm një Shqipëri pa Edi Ramën është Shqipëri evropiane” ka thënë kreu i PD-së Basha.
