73 persona kanë humbur jetën dhe 50 të tjerë kanë mbetur të plagosur si pasojë e një aksidenti tragjik në Afganistan.
Dy autobusë u përplasën me një cistern karburanti, duke u përfshirë menjëherë nga flakët. Përplasja tragjike ndodhi në provincën Ghanzi, në rrugën kryesore që lidh kryeqytetin Kabul me Kandaharin, qytet në jug të vendit.
Shkak i aksidentit sipas drejtorit të deparmatmentit të trafikut Mohamadullah Ahmadi, ka qenë një gabim i njërit prej drejtuesve të automjetit. Banorët e zonës në afërsi të aksidentit kanë ndihmuar forcat zjarrfikëse në operacionet e shpëtimit, por shumica e pasagjerëve janë “djegur plotësisht” si pasojë e flakëve masive.
Sipas të dhënave të autoriteteve lokale, në autobusë ndodheshin rreth 120 persona. Aksidentet janë të zakonshëm në Afganistan, ku rrugët janë shpesh në gjendje të rrënuar. Por gjithashtu edhe drejtuesit e automjeteve priren të mos respektojnë rregullat e qarkullimit.
