Policia e Kosovës ka zhvilluar të premten një aksion të gjerë në Prishtinë dhe Ferizaj për largimin e uzurpatorëve të ndërmarrjeve shoqërore, të cilat për vite me radhë nuk kanë arritur t’i marrin nën menaxhim pronarët legjitimë.
Muaj më parë gazeta “Zëri” pati botuar një hulumtim për këta uzurpatorë, ku bëhej e ditur se për vite me radhë pronarët legjitimë po dështojnë t’i marrin nën menaxhim ndërmarrjet e privatizuara, pasi ato nuk po lirohen nga të “fortit” e Kosovës.
Këto prona me vlerë prej qindra mijëra eurosh, apo edhe më shumë, janë mbajtur me vite të tëra të uzurpuara nga “të fortit” e Kosovës, ndonëse ato vite më parë janë privatizuar nga Agjencia Kosovare e Privatizimit (AKP). Gazeta “Zëri” në fund të dhjetorit të vitit që lamë pas kishte botuar një hulumtim disamujor në lidhje me uzurpimin e pronave shoqërore në vend, ku, sipas këtij hulumtimi, uzurpator i marketit “Egzoni” në lagjen “Qafa”, në Prishtinë, të privatizuar në vitin 2013 për mbi 182 mijë euro, ka qenë Fahredin Majkovci, sekretar i Bordit të Shërbimit Spitalor dhe Universitar të Kosovës (SHSKUK) dhe kryetar i Degës së Prishtinës në Partinë e Drejtësisë (PD), subjekt ky politik i cili qe dy mandate është pjesë e Qeverisë së Kosovës.
Uzurpator tjetër i një lokali në afërsi të hotelit “Grand” në Prishtinë, me emrin “Bab Club”, ka qenë Rrustem Rukolli, bashkëpunëtor i kryetarit të Skenderajt, Sami Lushtaku, të cilin e kishte privatizuar në vitin 2011 pronari i kompanisë zvicerane “Zoeb GmbH”, Xhevat Sadriaj, pasi që kishte paguar 144.000 euro. Këto lokale, bashkë me lokalin në sheshin “Zahir Pajaziti” në Prishtinë, të cilin e kishte privatizuar për 402 mijë euro një biznesmene me shtetësi të dyfishtë kosovarobritanike, janë liruar nga uzurpatorët në paraditen e së premtes nga Policia e Kosovës, me iniciativë të kryeprokurorit të Shtetit, Aleksandër Lumezi.
