Në 24 orët e fundit në Tiranë janë regjistruar disa raste të dhunës brenda familjes me pasojë dhunimin fizik në gradë të ndryshme të burrave dhe grave.
Një grua 36-vjeçare në Tiranë, ka zhdëpur më dru burrin e saj 22 vjet më i madh, duke detyruar sot policinë e kryeqytetit që ta marrë në mbrojtje.
“U plotësua kërkesë padia për lëshimin e urdhrit të mbrojtjes së menjëhershëm për shtetasin 58-vjeçar GJ.D., banues në Tiranë, pasi dyshohet se bashkëshortja, F.D, 36 vjeçe, ka ushtruar dhunë fizike dhe psikologjike ndaj tij”, – konfirmoi për noa.al, një burim zyrtar nga Policia e Shtetit.
E ndërsa gruaja rrahu burrin 22 vjet më të madh, një burrë ka rrahur gruan e tij 6 vjet më të vogël. Ngjarja ka ndodhur në Tiranë, ku policia tha zyrtarisht se u procedua për lëshimin e urdhrit të mbrojtjes së menjëhershëm për 32-vjeçaren A.R., pasi bashkëshorti i saj 38-vjeçar, E.R, ka ushtruar dhunë fizike dhe psikologjike ndaj saj.
Ndërkohë nga Komisariati i Policisë Nr. 4 mësohet se u arrestua në flagrancë 24-vjeçari A.K., banues në Tiranë, pasi rreth orës 22:30 të një dite më parë, në rrugën “Muhamet Deliu” pranë zonës së quajtur “Fresku”, ka ushtruar dhunë fizike ndaj të dashurës 20-vjeçare, J.G, edhe ajo, banuese në Tiranë.
Policia e këtij komisariati konfirmoi për noa.al se mbi të riun rëndon akuza “Shtrëngimi ose pengimi për të bashkëjetuar ose për të zgjidhur martesë”. Sipas këtij neni të KOdit Penal, “shtrëngimi ose pengimi për të filluar ose vazhduar bashkëjetesën ose shtrëngimi për të zgjidhur martesën, përbën kundërvajtje penale dhe dënohet me gjobë ose me burgim gjer në tre muaj”.
Një tjetër incident i ngjashëm u shënua në rrugën e “Kavajës”. S.S., 67 vjeç, banues në Tiranë, akuzohet se ka kanosur ish-nusen e djalit, shtetasen B.S, 23 vjeçe, për t’i marrë nipin 2 vjeçar.
Policia e Tiranës tha se 23-vjeçares iu plotësua kërkesë-padia për urdhër të menjëhershëm mbrojtjeje. Kurse u referuan materialet në Prokurorinë e Rrethit Gjyqësor Tiranë, për 67-vjeçarin që rrezikon nga një deri në dy vjet burg, pasi “rrahja, si dhe çdo vepër tjetër dhune, ndaj personit që është bashkëshort, ish-bashkëshort, bashkëjetues apo ish-bashkëjetues, gjini e afërt ose krushqi e afërt me autorin e veprës penale, me pasojë cenimin e integritetit fizik, psiko-social dhe ekonomik të tij, dënohet me burgim gjer në dy vjet”.
Sakaq, Komisariati i Policisë Nr. 1 plotësoi kërkesë-padi për lëshimin e urdhrit të mbrojtjes së menjëhershëm për 51-vjeçaren nga Tirana M.D., pasi vëllai i saj 60-vjeçar, N.A, edhe ai me banim në kryeqytet, ka ushtruar dhunë psikologjike dhe fizike ndaj saj.
Dhuna psikologjike ka pasur një tjetër “arenë” në Tiranë. Një 44-vjeçar nga Peshkopia, A.Z., me anë të telefonit, shqetëson shtetasin 56 vjeçar A.GJ., banues në fshatin Laknas. Policia thotë se po punohet për kapjen e A.Z. pasi rezulton të jetë zhdukur në drejtim të panjohur.
