Këshilli Drejtues i Radio Televizionit Shqiptar zgjodhi sot Thoma Gëllçin me shumicë të cilësuar, Drejtor të Përgjithshëm të RTSH-së.
Në mbledhjen e këshillit drejtues, Thoma Gëllçi mori 7 vota dhe Petrit Malaj 4 vota. Gëllçi u zgjodh me shumicë të cilësuar çka tregon se ka marrë mbështetjen edhe nga opozita.
Por kush është Thoma Gëllçi?
Ata që kanë vite në media, e njohin Gëllçin. Ai është ideatori dhe zbatuesi i një plani për blerjen masive të medias së shkruar dhe elektronike në vitin 2000 kur kryeministër ishte Ilir Meta, i cili aktualisht është kryetar i Kuvendit, shkruan City news.
15 vite më parë, Meta kishte disa muaj që kishte marrë detyrën dhe kërkonte që të mos kishte asnjë kundër, përfshirë këtu edhe median, kuptohet atë opozitare. Në këto kushte aty u gjend Thoma Gëllçi, i cili kishte qenë zëdhënës dhe drejtor i zyrës së informacionit gjatë kohës që kryeministër ishte Fatos Nano dhe të njëjtën detyrë mbajti edhe kur erdhi Meta në këtë post.
Ishte pikërisht Gëllçi që i propozoi Metës blerjen masive të medias. Me anë të disa vendimeve të Këshillit të Ministrave, Meta dha shuma parash për gazetat dhe televizionet që ishin atë kohë në vend. Përveç parave, ai u mbylli edhe llogaritë që këto kishin me tatimet dhe me të gjitha institucionet e tjera. Këtë operacion e ekzekutoi pikërisht, Thoma Gëllçi. Gjatë kësaj kohe i ofruan para edhe gazetës së PD-së, Rilindja Demokratike që në fakt i refuzoi, duke mos pranuar para nga qeveria. Në këtë kohë në krye të RD-së, ishte Astrit Patozi.
Por Gëllçit nuk i shkoi gjatë ky post, pasi u largua nga detyra. Ai kishte kohë që ishte në kryeministri, që prej vitit 1997, kur u emërua zëdhënës në qeverinë e Pajtimit Kombëtar të drejtuar nga Bashkim Fino. Para se të mbante këto detyra, Thoma Gëllçi kishte qenë edhe kryeredaktor i Zërit të Popullit për disa vite. Ai kishte drejtuar gazetën e PS-së, edhe para viteve ’90. Por me fitoren e së djathtës në vitin 2005, Gëllçi doli nga administrata shtetërore, raporton Citynews.
Për disa kohë ai është marrë me ofrimin e mundësisë për të aplikuar për llotarinë amerikane, deri sa kjo u bë online duke e nxjerrë pa punë. Pas kësaj kohe, ai ka ikur në SHBA, ku edhe jeton familja e tij. Prej disa ditësh është rikthyer në Tiranë ku kërkon që të marrë detyrën e drejtorit të Përgjithshëm të RTSH-së.
