Artan Lame kundër Ramës, organizon dëgjesën publike të shoqërisë civile. Arkitektë italianë dhe amerikanë kundër “Arenës Kombëtare”.
Artan Lame, një nga njerëzit më aktivë të shoqërisë civile, para se Rilindja të merrte pushtetin, është rreshtuar kundër Edi Ramës, duke organizuar një dëgjesë publike. Më 29 prill të këtij viti, ai u largua nga mbledhja e KKT-së, ku po diskutohej pikërisht dëgjesa për “Arenën Kombëtare”, në shenjë revolte ndaj organizuesve, për shkak se penguan shoqërinë civile të merrte pjesë.
Në atë ditë, Gjergj Bojaxhiu, Fatos Lubonja, Andi Bushati dhe Ylli Rakipi, bashkë me dhjetëra gazetarë të tjerë, nuk u lejuan të merrnin pjesë në atë mbledhje. Ata ishin ftuar “live” nga deputeti socialist Fidel Ylli, i cili gjatë emisionit “Të Paekspozuarit”, tha se mbledhja ishte e hapur dhe gjithsecili mund të merrte pjesë. Duke u nisur nga kjo deklaratë, shoqëria civile tentoi të merrte pjesë në mbledhjen e KKT-së, por nuk u lejuan nga gardistë, oficerë policie apo bodigardë të hotel “Tiranës”. Në atë mbledhje, Rama lëshoi disa batuta ndaj Artan Lames, ndërsa ky i fundit, në shenjë revolte, u largua nga salla e KKT-së.
Tashmë, disa ditë pas atij incidenti, shoqëria civile ka organizuar një dëgjesë publike, ku janë ftuar të gjithë grupet e interesit, por edhe arkitektë, apo urbanistë, të marrin pjesë. Mësohet se dëgjesa organizohet pikërisht nga Artan Lame, i cili ka mbështetjen edhe të Neritan Sejaminit. Organizatorët kanë bërë me dije se në këtë takim do të marrë pjesë edhe arkitekti i famshëm italianë, Paolo di Nardo, i cili para pak ditësh, kur dhe kishte mësuar se stadiumi i arkitektit italian që e projektoi, Gerhardo Bosio, do të prishej, tha në mënyrë figurative se do të organizonte disa kolegë dhe do të lidhej me zinxhirë në mënyrë që mos të prishej.
Në këtë takim do të marrin pjesë edhe disa arkitektë amerikanë, edhe ata të ftuar nga shoqëria civile, të cilët janë kundër prishjes së stadiumit kombëtar “Qemal Stafa” dhe ndërtimit në atë vend të “Arenës Kombëtare”. Sipas tyre, ndërtimi i stadiumit siç paraqitet edhe në projekt, prish të gjithë ansamblin në atë zonë, ku përfshihen Kolonadat, Sheshi Nënë Tereza, Universiteti apo Akademia e Arteve. Ndryshe nga organizimi i Ramës, dëgjesa publike që do të organizohet sot në 19:30 do të jetë e hapur për cilindo që ka dëshirë ta ndjekë nga afër.
