Gjykata e Tiranës ka dënuar me 18 vite burg ndërtuesin Hajdin Zyberaj, i cili akuzohet për mashtrim me pasoja të rënda. Ai shiste nga dy herë apartamentet, ndërsa drejtësia i ka faktuar rreth 32 raste. Sipas vendimit të gjykatës që disponon Bold News, rezulton se Zyberaj ka pasur në pronësi shoqërinë “DINI – 2009”, Shpk. Ai ka bërë disa ndërtime, kryesisht pranë Freskut, në periferi të Tiranës. Në 2009, komuna Dajt ka miratuar leje për sheshin dhe leje ndërtimi për një pallat.
Në periudhën në vijim ka filluar ndërtimi i objektit të miratuar dhe njëkohësisht lidhja e marrëveshjeve me pronarët e truallit, kontratat e porosisë apo sipërmarrjes me shtetas të ndryshëm kundrejt pagesave të kryera kesh, në llogari bankare të të pandehurit apo shoqërisë që ai përfaqëson.
Më nëntor 2013, Alban Pepkolaj ka lidhur kontratë porosie me firmën “DINI – 2009”, për blerjen e një apartamenti të banimit me sipërfaqe totale 98.1 m2. Kontrata është hartuar tek noterja Mimoza Mustafaj, ndërkohë që kallëzuesi ka paguar edhe shumën prej 29 430 euro.
Kallëzuesi ka ndjekur punimet ndërkohë që sipas bisedave me administratorin hyrja do të ishte gati në muajin dhjetor. Rreth 4-5 ditë përpara kallëzimit, ai ka mësuar se tek pallati ku ai kishte porositur, administratori kishte shitur disa herë të njëjtën hyrje. Kur ka shkuar tek apartamenti i tij ka mësuar se hyrja e tij i ishte shitur një personi tjetër me kontratë noteriale, ndërkohë që ka qenë i pamundur më tej komunikimi me Hajdin Zyberaj.
Në datat 19, 20, 23, 27 dhjetor 2013 e në vijim, shtetasit Bedri Hala, Agim Hala, Benard Xhemollari, Ibrahim Pepa, Hidushe Alcani, Fatime Hajdini, Florjan Skenderi, Simon Lala, Olsi Petroshi, Arben Alimi, Dhurata Ymeraj, Edmond Caka, Pavlin Prela, Gezim Leshaj, Joana Karafili, kanë kallëzuar të njëjtin mekanizëm ngjarje.
Ky fakt, pra mashtrimi ishte vënë re në fund të muajit nëntor të vitit 2013, kur ky shtetas ishte larguar jashtë Shqipërisë dhe nuk kishte asnjë kontakt me asnjë prej të dëmtuarve.
Këta persona në momentin që kishin shkuar te apartamentet e tyre të porositura dhe paguara sipas akteve noteriale kishin vënë re se hyrjet e tyre kishin një pronar tjetër, të cilët gjithashtu kishin kontratë për të njëjtin apartament.
(Boldnews)
