Ministria e Punëve të Brendshme ka reaguar në lidhje me akuzat e PD për arrestimin e Arben Frrokut por pa vënë në dispozicion ndonjë provë. Nëpërmjet një deklarate për mediat, Ministria sqaron se autoritet shqiptare kanë patur komunikim të vazhdueshëm me partnerët holandeze dhe se policia bëri detyrën me korrektesë absolute sipas ligjit.
Por Ministria e Brendshme nuk sqaron ngërçin me autoritetet hollandeze për shenjat e gishtërinjëve për shtetasin Arben Frroku.
Ministria e Brendshme shton më tej se “brenda një kohe rekord janë dërguar në Holandë të dhënat krahasuese dhe dje në orët e pasdites është konfirmuar identiteti, u shpall arresti dhe nisi procedura e ekstradimit të tij”
Por në vazhdën e kësaj deklarate, faktet tregojnë se Arben Frroku është arrestuar më 6 mars nga autoritetet hollandeze dhe Shqipërisë iu desh dy muaj për ta identifikuar.
Në fund, Ministria deklaron se akuzat e PD kanë si qëllim të përbaltin punën e policisë së shtetit, ndërsa i kërkon që të rreshtohet në anën e ligjit dhe institucioneve, dhe të lërë drejtësinë të bëjë drejtësi ndaj krimit.
Deklarata e plotë e Ministrisë së Brendshme
Nuk është hera e parë që Policia e Shtetit vihet në qendër të akuzave të PD-së, e cila qartazi ka vetëm një qëllim; përbaltjen e punës së Policisë. Akuzat e rradhës nga PD-ja, janë vazhdimi i sulmeve dhe përbaltjes së Policisë së Shtetit dhe rezultateve të saj. Është tashmë e qartë se PD nuk e gjen dot veten në anën e institucioneve dhe Policisë së Shtetit. Sot akuzojnë Policinë, duke pasur si model vetveten dhe sjelljen e tyre në të kaluarën.
Shqiptarët e kanë të freskët kujtesën kur Policia luftonte në Lazarat, duke ç’rrënjosur njëherë e mirë Shqipërinë nga harta e kultivimit të drogës, ndërkohë që PD jo vetëm nuk mbështeti njëherë të vetme Policinë, por bënte të kundërtën, duke mbrojtur krimin që mbizotëronte në “Republikën e drogës”.
Policia e Shtetit është në krye të detyrës, në rrugën e reformimit, në shërbim të qytetarëve pa asnjë dallim, e vendosur të çojë para ligjit, këdo.
Në respekt të opinionit publik, theksojmë edhe njëherë angazhimin e Ministrisë së Punëve të Brendshme dhe Policisë së Shtetit për të përballur me drejtësinë, çdokënd që ka shkelur ligjin. Dosja “Frroku” dëshmon më së miri vullnetin e Policisë së Shtetit për të bërë detyrën me korrektesë absolute në përputhje me ligjin.
Autoritetet shqiptare kanë patur komunikim me partnerët dhe sapo ka ardhur sinjali i parë për vendndodhjen e të dyshuarit Arben Frroku, brenda një kohe rekord janë dërguar në Holandë të dhënat krahasuese dhe dje në orët e pasdites është konfirmuar identiteti, u shpall arresti dhe nisi procedura e ekstradimit të tij.
Ministria e Punëve të Brendshme i bën thirrje PD-së të rreshtohet në anën e ligjit dhe institucioneve, e të lërë drejtësinë të bëjë drejtësi ndaj krimit, pa dallim. Politika me krimin nuk ndihmon askënd e as mund të përdoret për të shmangur detyrimin madhor para qytetarëve, për reformën në drejtësi.
