Për herë të parë në historinë e iPhone-it, Apple pëson ulje të shitjeve të telefonave inteligjentë. Pas pesë tremujorëve të suksesshëm, ku Apple arriti shifra rekord të të ardhurave, tremujori i parë i vitit 2016 pritet të jetë më i keqi në 13 vite.
Kompania parashikon që të ardhurat të bien me 10% krahasuar me të njëjtin tremujor të vitit të kaluar. Në tremujorin e parë të vitit 2015 Apple shiti 61.2 milionë iPhone, ndërsa për tremujorin e parë të vitit 2016 Apple nuk ka shitur më shumë se 50.4 milionë, një rënie prej 18%. Kjo është një goditje për Apple, 2/3 e fitimeve të së cilës vijnë pikërisht nga shitjet e iPhone.
Mendohet se arsye për këtë rënie në shitje është Kina, tregu i së cilës ka qenë në fokusin e kompanisë amerikane prej dy vjetësh, ndërkohë që nuk janë përmbushur objektivat.
Po ashtu, edhe konkurrenca nga Samunsg si dhe rritja e disa kompanive kineze si Huawei kanë ndikuar në rënien e shitjeve të iPhone.
