Mynyr Koni duket se do të jetë Rektori i ri i Universitetit të Tiranës. Sot janë zhvilluar zgjedhjet në të gjitha universitetet në vend, ku pjesëmarrja ka qenë masive. Megjithëse nuk ka patur incidente gjatë procesit të votimit, një grup studentësh në Universitetin Politeknik zhvilluan sot një protestë, duke u bërë thirrje studentëve të bojkotojnë procesin zgjedhor.
Sipas tyre, bojkoti është zgjidhja më e mirë, pasi vota e tyre nuk përbën asnjë diferencë në këto zgjedhje.
Studentët thonë se këto zgjedhje nuk do të sjellin asnjë ndryshim si për cilësinë, tarifat dhe kushtet e ambienteve ku ata zhvillojnë mësim.
Rreth orës 20:00 të mbrëmjes ka përfunduar numërimi i votave për stafet akademike në Universitetin e Tiranës. Nga numërimi ka rezultuar se kandidati për Rektor, profesor Mynyr Koni ka marrë 460 vota, ndërsa Klodeta Dibra ka marrë 243 vota, por pritet numërimi i votave të studentëve.
Megjithatë vota e studentëve ka 10% të peshës në rezultat, ndërsa vota e pedagogëve 90%, çka tregon se rezultati është e vështirë të përmbyset, nisur nga diferenca e madhe mes dy kandidatëve.
Ndërkaq në Elbasan ka përfunduar numërimi dhe rektor është zgjedhur profesor Skënder Toti, i cili ishte edhe kandidati i vetëm. Mësohet se Toti ka fituar 92% të votave.
Ka mbaruar numërimi i votave për zgjedhjen e rektorit të Universitetit të Korçës, ku fitues rezulton Ali Jashari. Ai ka marrë 78 vota, kundrejt kandidatit tjetër për rektor, Lorenc Konomi që mori 68 vota.
