Ministri i Drejtësisë, Ylli Manjani, ka hedhur poshtë propozimin e ministrit Gjiknuri përsa i përket ndriçimit të rrugëve të Tiranës dhe Durrësit.
Kjo përplasje mes dy aleatëve të qeverisë PS – LSI është treguar dhe nga gjuha e përdorur nga ministri Manjnani.
Ndërkohë, qeveria kishte planifikuar të jepte me koncesion ndriçimin e rrugëve të Tiranës dhe të Durrësit.
Por ministri i Drejtësisë, duke i kthyer përgjigje, e konsideron të paligjshëm zhvillimin e tij. “Ministria e Energjisë nuk është pronar i çdo çelësi dritash”, thuhet në letrën e Manjanit. Në letrën dërguar ministrit të Energjetikës, Gjiknuri, ministri Manjani kërkon kthimin mbrapsht për projektin e dhënies me koncesion të rrugëve të bashkive të kryeqytetit dhe Durrësit nga një firmë daneze “HeSaLajt A/S”.
KËRKESA E KONCESIONIT
Nuk dihet ende nëse propozimi i koncesionit është ofertë e pakërkuar nga kompania apo është vetë qeveria që i ka kërkuar të bëjë studimin kompanisë, për të cilën më pas do të shpallej tenderi. Referuar kthimit të përgjigjes, përveç tejkalimit të kompetencave, ministri i Drejtësisë, Ylli Manjani, vë në dyshim projektin për koncesion, duke u shprehur në letrën dërguar ministrit Gjiknuri se është e paqartë zanafilla e propozimeve të kompanisë daneze “HeSaLajt A/S”, që ka kryer një studim për sistemin e ndriçimit në Bashkinë Tiranë dhe Durrës. “Ministria e Energjisë dhe Industrisë nuk duhet të jetë autoritet kontraktor për të ndërmarrë procedurat për dhënie koncesioni ndriçimin publik në territoret e bashkive, pasi ajo është autoritet politikëbërës dhe standardizues, nuk është një autoritet zbatues.
SHKELJET E LIGJIT Ministria e Drejtësisë e mbështet kërkesën për kthimin e koncesionit, pasi projekti i saj nuk është në përputhje me legjislacionin në fuqi, dhe se në mënyrën se si është hartuar del mbi ligjin. Mësohet se ministri Gjiknuri i ka kërkuar, më 1 prill të këtij viti, ministrit të Drejtësisë Manjani të shprehej në lidhje me një projektvendim për të zhvilluar një tender, ku do t’i jepej me koncesion një firme daneze ndriçimi publik i Tiranës dhe Durrësit.
Sipas ministrit, është cenim i autonomisë vendore, në një kohë kur qeveria hyn në çështjet e administrimit të një shërbimi që u takon bashkive. Ndriçimi publik në rrugët kombëtare është përgjegjësi e Autoritetit Rrugor Shqiptar, ndërsa rrugët vendore u përkasin bashkive”, ka argumentuar ministri Manjani mbi refuzimin e projektit. Duke e sqaruar teknikisht, Manjani shprehet se projekti propozon hapësirë për përplasje të kompetencave ndërinstitucionale dhe përplasje të kompetencave me pushtetin vendor. “Ndriçimi publik në rrugët kombëtare është përgjegjësi e Autoritetit Rrugor Shqiptar, ndërsa rrugët vendore u përkasin bashkive”, shpjegon ministri. Kujtojmë se debatet për koncesionet kanë përfshirë edhe institucionet ndërkombëtare, ku Fondi Monetar Ndërkombëtar kërkoi që të llogariten risqet dhe të bëhen transparente shpenzimet që buxheti bën për to.
