Pronarët tashmë do të mund të marrin 70% të vlerës së shpronësimit për efekt të procesit të legalizimeve.
Deri më tani këto familje përfitonin katër këste, ose thënë ndryshe 57 për qind të vlerës së pronës, dhe për pjesën e mbetur të pagesës u duhej të viheshin në radhë pritjeje.
Në këtë mënyrë detyrimi që i mbetet agjencisë përkundrejt tyre reduktohet në masën 30 për qind. Kjo vlen për aplikimet e reja që do të depozitohen.
Vendimi
Vendimi për rritjen e masës së kompensimit u paralajmërua më herët nga ministri i Drejtësisë, Ylli Manjani, i cili u zotua po ashtu për likuidimin në masën 100 për qind të këtyre pronarëve deri në 2017n. Ndërkohë jo më larg se dje, drejtoresha e Agjencisë së Trajtimit të Pronave, Sonila Qato, njoftoi konkretizimin e hapit të ndërmarrë. “Në kuadër të shpërndarjes së fondit të kompensimit në vlerë për pronarët e pasurive të paluajtshme pronë private, që preken nga ndërtimet informale, falë punës intensive të stafit të ATPsë dhe me mbështetjen e qeverisë, ka arritur të rrisë masën e kompensimit për pronarët prona e të cilëve preket nga ndërtimet informale. Deri në vitin 2013, shpërblimi për këta pronarë ka qenë në masën 57% të vlerës së miratuar. Tashmë, falë fondeve të akorduara nga Buxheti i Shtetit, kemi arritur të rrisim masën e shpërblimit nga 57% në 70% të vlerës së miratuar”. KOMPENSIMI I PLOTË Dje u publikuan emrat e 1490 familjeve të shpronësuara, të cilat kishin përfituar më herët katër këste dhe u ishte miratuar kësti i radhës. Drejtoresha e ATPsë shprehu angazhimin për vendosjen e afateve konkrete për përmbylljen e këtij procesi. Pra, për kompensimin e plotë të pronarëve që preken nga ndërtimet informale brenda një kohe të shkurtër. Veç kësaj, drejt zgjidhjes do të shkojë edhe problematika e vonesave në ndarjen e parave, duke bërë që dy proceset, përkatësisht ai legalizues dhe ai kompensues, të ecin paralelisht. “Agjencia e Trajtimit të Pronave angazhohet se do të punojë për të arritur objektivin që brenda një afati të arsyeshëm të arrihet në 100% masa e shpërblimit, duke përmbyllur në këtë mënyrë një proces mjaft të rëndësishëm. Objektivi i Qeverisë dhe i ATPsë është kryerja paralelisht e dy proceseve shumë të rëndësishme, atë të nisur tashmë nga ALUIZNI, për legalizimin e ndërtimeve pa leje dhe i kompensimit të pronarëve prona e të cilëve preket nga këto ndërtime nga ana tjetër”, thekson më tej Qato. Rritja e masës së kompensimit do të aplikohet për çdo aplikim të ri që do të kryhet pranë agjencisë në vijimësi. Ndërsa familjet që deri më tani janë paguar me katër këste, në mënyrë graduale do të përfitojnë edhe pagesën e radhës. Drejtoresha ka sqaruar se ky proces nuk kushtëzon atë për kompensimin e pronarëve të vjetër. Fondi që përdoret për kompensimin e familjeve që preken nga ndërtimet pa leje vihet në dispozicion nga ALUIZNI.
