Moratoriumi i pyjeve duket se ka dhënë efektet e para. Policia e Fierit ka arrestuar një person, i cili kishte ngarkuar me 9.7 m3 dru të prerë.
I arrestuari nga specialistët e Sektorit për Krimin Ekonomik është Myrteza Myftari, 54 vjeç, banues në fshatin Mbreshtan, Berat.
Policia e Fierit ka qënë kontradiktore në deklaratën e saj për shtyp, pasi thuhej se Myftari ishte arrestuar pasi iu gjet sasi druri pa faturë shoqërimi malli. Mesa duket Policia e Fierit ende nuk është informuar se prej disa muajsh tashmë ka hyrë në fuqi moratoriumi i pyjeve dhe nuk nevojitet faturë malli, pasi nuk lejohet në mënyrë kategorike prerja e pyjeve në të gjithë territorin e Shqipërisë.
Më poshtë keni njoftimin e Policisë së Fierit:
“Arrestimi i këtij shtetasi u bë pasi në vëndin e quajtur “Pushimi i shoferit’” u kap dhe u bllokua automjeti tip “Benz” kamion, me targa AA 720 HO, ku kishte të ngarkuar 9.7m3 dru të prerë pa faturë shoqërimi malli.Materialet i kaluan Prokurorisë pranë Gjykatës së Shkallës së Parë Fier për veprat penale “Fshehja e të ardhurave” dhe “Prerja e paligjshme e pyjeve” parashikuar nga Nenet 180 dhe 205 të Kodit Penal“, sqaron policia e Fierit.
