Klodeta Dibra ka akuzuar rivalin e saj për rektoratin e Univertitetit të Tiranës Mynyr Koni se ka penguar zhvillimin normal të fushatës, duke hequr posterat dhe duke mos lejuar pedagogë e studentë të dëgjojnë platformën e saj.
Në një postim në rrjetin social, Facebook, Dibra thotë se profesor Mynyr Koni përdori FSHN-në si pronë të tij.
“Mjetet e turpshme që u përdorën sot për të ndaluar fushatën e ndershme që do të realizohej në mjediset e Fakultetit të Shkencave të Natyrës implikojnë direkt kandidatin për Rektor, Prof. Dr. Mynyr Koni, konkurrentin tim në këto zgjedhje. Z. Koni përdori këtë mënyrë arkaike të ndalonte pedagogët dhe studentët të dëgjonin drejtpërdrejt programin tim për drejtimin e UTsë” tha Dibra.
Kanë mbetur vetëm katër ditë nga zgjedhja e drejtuesve të rinj në Universitetin e Tiranës, gara ka marrë të tjera përmasa.
Takimi i paralajmëruar i kandidates për rektore, Klodeta Dibra, në auditorin 412 A te Fakulteti i Shkencave të Natyrës, nuk shkoi ashtu siç ishte parashikuar.
Në orën 13:00, në pikun e mësimit në auditore, ato mësohet të kenë qenë praktikisht boshe, ndërsa porta hyrëse është mbyllur me zinxhirë. Thirrjes për të bashkëndarë platformën e Dibrës i janë përgjigjur shumë pak studentë e pedagogë.
“Janë hequr të gjithë posterat e tjerë dhe sot gjej shumë pak kolegë, pjesa më e madhe është trysnuar sepse janë boshatisur auditoret. Ky Fakultet ka 7 mijë studentë dhe mësimi zhvillohet deri në orët e vona të pasdites. Nëse do të hynit sot nëpër auditore, nuk ka studentë, janë përcjellë thjesht dhe vetëm për të dështuar takimi i kandidates për Rektore, ndërkohë që është e drejta ime për të takuar studentët dhe për t’u përcjellë atyre alternativën time”, sqaron Dibra.
Nisur nga ngjarja e një dite më parë, kandidatja për rektore iu bën thirrje votuesve të mos frikësohen në hedhjen e votës me vullnet të lirë më 20 prill.
