Kujdestarja, Dafina Fama, është dënuar nga gjykata e Durrësit me 18 muaj shërbim prove, pasi dhunoi brutalisht të miturin jetim në shtëpinë e fëmijës në Durrës.
Prokuroria ka kërkuar 3 muaj burgim për kujdestaren që dhunoi të miturin, mirëpo Gjykata ka vendosur që ta dënojë me 2 muaj burgim. Asaj i ulet 1/3 e dënimit për shkak se nuk ka precedentë të mëparshëm penal. Gjithashtu, vendimi përfundimtar është 18 muaj shërbim prove me kusht që të mos kryejë asnjë vepër penale. Ajo tashmë do të lirohet nga “Burgu i Grave” në Tiranë, ku gjendej nën arrest me burg.
Vendimi i Gjykatës së Durrësit:
Deklarimin fajtore i të pandehurës Dafina Fama, për veprën penale të “Keqtrajtimi i të miturit” dhe në bazë të nenit 124 germa “b” paragrafi parë e 49 të K.Penal e dënon me 3 (tre) muaj burgim.
Në aplikim të nenit 406 të K.Pr.Penale i ulet 1/3 e dënimit penal me burgim të dhënë dhe e pandehura Dafina Fama, dënohet me 2 ( dy) muaj burgim. Në bazë të nenin 59 të K.Penal, për shkak të rrezikshmërisë së pakët të të pandehurës, pezullohet ekzekutimi i vendimit për pjesën e mbetur të dënimit penal me burgim të pavuajtur nga e pandehura Dafina Fama, për një periudhë kohe prove prej 18 muajsh, me kusht që e pandehura të mos kryejë vepër tjetër penale gjatë periudhës së provës.
Bazuar në nenin 61 të K.Penal, detyrohet e pandehura Dafina Fama të mbajë kontakt me Shërbimin e Provës të Qarkut Durrës, gjatë periudhës së provës. Urdhërohet lirimi i të pandehurës Dafina Fama nga I.E.V.P Burgu nr.325, Rr.”Ali Demi”¬ (Seksioni Grave) Tiranë ( që aktualisht ndodhet në spitalin e burgut Tiranë). Një kopje e këtij vendimi i dërgohet prokurorisë së Rrethit Gjyqësor Durrës për zbatim. Shpallet e drejta e ankimit. U shpall në Durrës më datë 15.04.2016.
