Edhe Shërbimi i Çështjeve të Brendshme ka nisur hetimet për vrasjen e Ida Dervishit, gruas së garidistit, Admir Dervishi, i vrarë nga ky i fundit.
Burime nga Drejtoria e Shërbimit të Çështjeve të Brendshme thanë se hetimi ka nisur nga deklaratat e bëra publike, kryesisht nga nëna e Ida Dervishit, Feride Spahia, e cila shprehej se dy punonjës policie kanë qenë në dijeni të konfliktit dhe nuk kanë arritur të parandalojnë ngjarjen.
Për këtë arsye është bërë një verifikim i hollësishëm dy Komisariate, atë nr.4 dhe nr.6, të cilat kishin në juridiksion banesat ku ka jetuar çifti Dervishi. Gjithashtu, edhe në Gardën e Republikës, ku ishte me detyrë që nga viti 2009 autori i krimit në familje, Admir Dervishi. Burimet thanë se u është marrë deklarim nga oficeri i SHÇBA, punonjësit të Komisariatit nr.6 dhe oficerit të Gardës. Megjithatë, nuk është konstatuar asnjë provë apo shkresë e mbërritur në rrugë ligjore, ose e depozituar nga viktima e familjarët e saj, që mund t’i bëjë ata përgjegjës për ngjarjen që ka ndodhur. Nga verifikimet e kryera në Komisariatin nr.4 është konstatuar se të gjitha veprimet ligjore janë kryer në zbatim të urdhrit të mbrojtjes me afat njëvjeçar, që ishte lëshuar nga Gjykata e Tiranës.
