Ministria e Financave realizoi dje një ankand te suksesshëm për shitjen e obligacionit 10-vjeçar, duke siguruar interesat më të ulta historike që kur instrumenti 10-vjeçar i borxhit nisi emetimin në fund të 2013.
Shuma ofruar për blerjen e obligacionin ka qenë 63 për qind më shumë se kërkesa e qeverisë prej 2.3 miliardë lekësh.
Qeveria arriti të emetojë borxhin 10 vjeçar me një interes 5.80 për qind, i cili rezultoi 2.1 pikë përqindje më i ulët se ankandi i zhvilluar në janar të këtij viti për obligacionin 10-vjeçar.
Ulja e në minimumet e historike të normës bazë të interesit ne vetëm 1.5 për qind dhe likuiditetet e tepërta të bankave për shkak të mungesës së kredisë duket se kanë krijuar terren të përshtatshëm për kostot e borxhit qeveritar. Duke shfrytëzuar kushtet e mira qeveria ka shpeshtuar ankandet e obligacioneve duke emetuar borxh afatgjatë 5-7 dhe 10 vjeçar.
Gjatë vitit që shkoi u zhvilluan rreth 5 ankande obligacionesh 5 vjeçare. Interesi mesatar u luhat në intervalet 6.1-6.8 për qind.
Ministria e Financave ka analizuar se financimi i ri gjatë vitit 2015 është realizuar tërësisht nëpërmjet instrumenteve afatgjata, kryesisht nëpërmjet obligacione 7 dhe 10 vjeçare, duke kontribuar në përmirësimin e strukturës së borxhit dhe zgjatjes së jetëgjatësisë së tij.
Financimi i deficitit gjatë 2015 realizuar në vlerën 113 % në favor të instrumenteve me afat të gjatë maturimi, ndërkohë që instrumentet me afat të shkurtër janë shoqëruar me maturim në vlerën e 12.56%.
Ministria arsyeton se, realizimi i financimit kryesisht nëpërmjet instrumenteve afatgjata ka ardhur si rezultat i normave më të favorshme që ofrojnë këto instrumente krahasuar me instrumentet afatshkurtra dhe si rezultat i perceptimit të një risku relativisht më të ulët nga ana e investitorëve vendas. /Monitor/
