Më 7 prill Shqiptarja.com e konsideruar si një nga mediat pranë qeverisë, raportoi për dëshminë e ushtarit të mbijetuar nga rrëzimi i helikopterit në Liqenin e Shkodrës.
“Koha ishte shumë e mire, ndërsa në kabinë nuk kishte asnjë sinjal alarmi apo avarie deri në momentin e përplasjes”. – raportoi Shqiptarja.com duke cituar ushtarin Gerald Baramuça i cili ndodhet në Spitalin e Traumës në Tiranës.
Por arsyeja e këtij manipulimi mediatik u krijua për të sfumuar dyshimet mbi rrëzimin e këtij helikopteri. Kjo pasi, Shqiptarja.com pretendoi se kishte marrë dëshimin e Togerit Baramuça një ditë pasi helikopteri u rrëzua.
Prej disa ditësh, Togeri ka qënë në gjendje të rëndë psikologjike dhe gjatë gjithë kohës është monitoruar nga Forcat e Armatosura, ku asnjë familjar, zyrtar, prokuror apo media nuk është afruar për të marrë informacion mbi ngjarjen.
Vetëm këtë të dielë, oficerët e Policisë Gjyqësore të Tiranës kanë mundur të marrin në pyetje Gerald Baramuçan, të mbijetuarin e vetëm të incidentit të helikopterin EC 145, në të cilin, pas rrëzimit në ujërat e liqenit të Shkodrës, vdiqën dy kolegët e tij, Florian Deliaj dhe Donald Hoxha.
Por edhe në këtë dëshmi, togeri Baramuça deklaroi nuk mban mend asgjë nga dita e ngjarjes, ku helikopteri ushtarak me tre persona në bord u rrëzua në ujë, pranë fshatit Grizhë.
Boldnews.al ka mësuar se oficerët e Policisë së Tiranës, të deleguar për kryerjen e veprimeve hetimore nga ana e Prokurorisë së Shkodrës, i kanë parashtruar të plagosurit pyetje të detajuara lidhur me itenerarin, lëvizjen, faktin se përse gjendeshin në atë zonë, momentin e rrëzimit, nëse ka pasur defekte të dukshme gjatë fluturimit të helikopterit, si edhe çastet e fundit para përplasjes së mjetit fluturues me sipërfaqen e ujërave të Liqenit të Shkodrës.
Por për çdo pyetje, togeri Baramuça përgjigjej që nuk mbante mend asgjë.
Ky lajm i Shqiptarja.com vërtetoi edhe njëherë se mediat në vendin tonë janë shumë larg vertetësisë së përcjelljes së lajmit.
