Ministria e Ekonomisë në Shkup i ka mohuar lajmet e fundit rreth bllokimit të produkteve ushqimore shqiptare në kufirin e saj.
Nëpërmjet një njoftimi për shtyp, kjo ministri bën me dije se kanë të drejtë sipas ligjit që të kontrollojnë produktet ushqimore në rast se dyshojnë. Ajo ka thënë se kanë dyshuar për pesticide dhe ndaj produktet ushqimore shqiptare i janë nënshtruar një analize.
Më tej, në njoftimin për shtyp kjo ministry thotë se nuk ka pasur dhe nuk ka kamionë të bllokuar në kufirin midis Shqipërisë dhe Maqedonisë.
Ministria e Ekonomisë njofton se, për shkak të dyshimeve për sasi të shtuar të pesticideve në produktet bujqësore që vijnë nga jashtë, Agjencia për Ushqimin dhe Veterinarinë ka shtuar kontrollet në vendkalimet kufitare.
Gjatë ditëve të kaluara, 9 kamionë me produkte shqiptare u janë nënshtruar analizave dhe, pas përfundimit të procedurave të nevojshme, janë lejuar të kalojnë kufirin.
Në njoftimin e saj për mediat, Ministria e Ekonomisë citon nenin 17 të “marrëveshjes rajonale për tregtinë e lirë”, ku thuhet se, në qoftë se ekziston dyshimi që produktet e importuara të mund të kenë sasi të mëdha pesticidesh, shteteve u jepet mundësia për t’i ndaluar ose kufizuar ato produkte, deri në analizat përkatëse.
