Nëna e paralizuar e gruas së vrarë nga gardisti, Feride Spahiu, ka treguar të gjitha momentet e dhunës që vajza ka përjetuar nga burri i saj si dhe ka thënë se vrasja ka qenë e paralajmëruar.
“Ishte krim i paralajmëruar. Dhe jo një herë, por disa herë, e askush nuk e mori mundimin ta parandalonte këtë që ndodhi, e të shpëtonte vajzën time nga ai njeri. E kam marrë vesh nga televizori, duke parë lajmet në mëngjes. Por unë e mora vesh sikur ajo ishte plagosur dhe ishte jashtë rrezikut për jetën”, ka thënë ajo në një intervistë për gazetën “Panorama”.
Mes lotësh nëna tregon se ai e ka vrarë vajzën me gjakftohtësi, ashtu siç e kishte paralajmëruar edhe herë të tjera. Sipas saj, e bija kërcënohej çdo natë.
“Sa herë ia jepte truri. Atë dhe djalin e vogël. Asaj i thoshte: “Do të vdesësh e re, moj qyqe”. Ndërsa të birit, vetëm 5 vjeç, i thoshte: “Mami do të vdesë shumë shpejt. Ty do të të rrisë një mami tjetër”.
Nëna e Idës rrëfen edhe momentin kur mori lajmin e keq 0për vdekjen e vajzës së saj.
“Sapo kam parë këtë lajm, kam marrë taksi dhe jam nisur për te shtëpia e vajzës që të merrja fëmijët. Gjithnjë me shpresën se ajo ishte gjallë. Thosha vazhdimisht me vete që ime bijë eshtë e re dhe do të shpëtojë. Do t’ia hedhë edhe kësaj here”, thotë ajo.
