Duke bërë një vlerësim për rritjen e pritshme ekonomike për periudhën 2016-2017, Banka e Botërore në raportin rajonal “Ribalancim për rritje më të fortë” të prezantuar sot ka evidentuar pesë rreziqe që kanosin procesin e rimëkëmbjes.
Nga faktorët e jashtëm renditen tre si më kryesore: luhatshmëria e tregjeve financiare, rritja më e ulët në tregjet eksportuese dhe lëvizjet e çmimeve të lëndëve të para në Bursa.
Ndërsa si arsye të brendshme shihen zgjedhjet e përgjithshme parlamentare të 2017 dhe shpejtësia e reformave strukturore dhe fiskale.
Në vlerësimin e përgjithshëm banka evidenton një rikthim të rritjes ekonomike në 2015-ën, e udhëhequr nga investimet dhe eksportet.
Banka ve ne dukje se ribalancimi i burimeve të rritjes ka filluar dhe për të siguruar qëndrueshmërinë e tij është e nevojshme adresimi i deficiteve fiskale dhe të jashtme dhe forcimi i trendit pozitiv të produktivitetit.
Institucioni Financiar Ndërkombëtar rekomandon se reformat duhet të përqendrohen në përmirësimin e klimës së biznesit dhe qeverisjes, përmirësimin e drejtësisë, cilësisë dhe eficensës së shërbimeve publike dhe mbrojtjes sociale.
Rritja e produktivitetit vjen nga garantimi i përdorimit të qëndrueshëm të energjisë dhe burimeve natyrore dhe ruajtje e mjedisit. Eliminimi i faktorëve dekurajues dhe barrierave në punësimin formal, paraqet mjaft rëndësi, sipas analizës së BB. /Monitor/
