Pas skandalit të “Letrave të Panamasë” ku ishte e implikuar edhe kompania e markimit të karburanteve GFI Albania, vjen edhe reagimi i kësaj të fundit. Nëpërmjet një njoftimi për shtyp, GFI Albania deklaron se është gjendur ditët e fundit nën një sulm mediatik të paprecedent, të pakuptimtë dhe dashakeqës.
“Aludimi në media se shoqëria GFI Technologies ka fituar të drejtën e koncesionit të markimit të karburanteve në Shqipëri menjëherë pas themelimit në Maj 2013 është tërësisht i pavërtetë. Konçesioni i markimit në Shqipëri nuk ka asnjë lidhje me shoqërinë GFI Technologies. – Propozimi për të ndërtuar një projekt markimi të karburanteve i është parashtruar Qeverisë së Shqipërisë që në vitin 2010. Në vitin 2011 zbatimi i një projekti të tillë kombëtar është miratuar nga qeveria dhe është hedhur baza ligjore për shpalljen e një procedure konkurruese. Kjo procedurë është zhvilluar në vijim në vitin 2012, kurse kontrata konçesionare është nënshkruar në Shkurt 2013 pas muajsh të tërë negociimi. Në mënyrë ndoshta unike në procedurat konkurruese të organizuara nga entet publike shqiptare, procesi i tenderimit është shoqëruar edhe me testim fizik të kapaciteteve teknologjike.” – thuhet më tej në deklaratë.
GFI Albania reagon edhe ndaj raportimeve të mediave të huaja por edhe shqiptare se kjo kompani ka kryer transferta të dyshimta në zonat offshore.
“Mediat kanë aluduar se GFI Albania ka kryer transferta të dyshimta në shifra 400 dhe 500 mijë Euro. Theksojmë me forcë se kjo është një shpifje tërësisht abuzive. Aktiviteti financiar i GFI Albania është krejtësisht transparent, i bazuar në legjislacion dhe lehtësisht i monitorueshëm si nga Autoriteti Kontraktues ashtu dhe nga të gjitha organet ligjzbatuese të shtetit shqiptar. Dëshirojmë të garantojmë opinionin e shëndoshë publik se aktiviteti i GFI Albania është në mbrojtje të interesave të qytetarëve shqiptarë duke mbështetur Qeverinë e Shqipërisë në luftën e saj kundër kontrabandës dhe evazionit fiskal në sektorin e karburanteve.”– përfundon deklarata. (Shkarko njoftimin e GFI Albania)
