Grupi parlamentar i Partisë Socialiste ka diskutuar sot për referendumin që kjo forcë do të zhvillojë më 9 prill për t’i dhënë një përgjigje pyetjes nëse duhet të ketë zgjedhje për kryetar apo jo.
Kryeministri Edi Rama, mësohet se ka kërkuar pjesëmarrje masive të anëtarëve të kësaj force, duke iu kërkuar deputetëve të lobojnë për këtë gjë.
“Të gjithë në referendum më 9 prill. Të kemi pjesëmarrje sa më të lartë. Të kuptohet rëndësia e votës së socialistëve. Në çdo njësi të lobohet për pjesëmarrje sa më aktive”, mësohet të ketë thënë Rama.
Ndërkohë nënkryetari i grupit parlamentar të PS-së, Taulant Balla tha se referendumi është hapja e një rruge të re në përfshirjen e çdo anëtari në familjen tonë politike.
“PS është një gjë shumë e madhe ku vendimmarrjet tona me rëndësi të veçantë të jenë ekskluzivitet i forumeve të brendshme të PS. Referendumi është dhe do të mbetet hapja e një rruge të re në përfshirjen e çdo anëtari në familjen tonë politike. Ky referendum i ofron çdo anëtari mundësinë të thonë fjalën e tyre për një debat tonin të brendshëm”, u shpreh ai.
Për Ballën një Parti Socialiste më e hapur është kusht për zhvillimin e vendit. “Jemi udhëhequr nga vetëdija se një PS më e hapur përbën një parakusht për avancimin social dhe ekonomik të Shqipërisë sonë. Referendumi i 9 prillit, ushtrim demokratik që e fusim në jetën politike, dhe që në të ardhmen synojmë ta përdorim edhe për çështje të tjera. Çdo socialist i ftuar të marrë pjesë”, deklaroi Balla.
