Kryetari i Autoritetit të Mediave Audiovizive, Gentian Sala ka punësuar në institucionin e tij dy gazetarë të Top Channel. Bëhet fjalë për Urim Bajramin dhe Monika Stafën, që do të jenë në krye të Këshillit të Ankesave të AMA-s.
Pjesë e këtij Këshilli do të jetë edhe Erald Kapri i cili vjen nga radhët e Partisë Demokratike.
Roli i kësaj strukture, tashmë të plotësuar, do të jetë mbikëqyrja e zbatimit të kodit dhe rregulloreve të miratuara nga AMA, që kanë të bëjnë sidomos me respektimin e dinjitetit dhe të drejtave të tjera themelore të njeriut, në mënyrë të veçantë mbrojtjen e të miturve, të drejtës për informacion dhe sensibilizimit të opinionit publik, lidhur me respektimin e normave morale dhe etike në programet e ofruesve të shërbimeve audiovizive.
Me pak fjalë, gazetarët e Top Channel të punësuar në AMA do të monitorojnë mediat e tjera nëse kryejnë ose jo shkelje.
Edhe më herët, kryetari i AMA-s, Gentian Sala është përfolur për lidhjet e tij të ngushta me Top Channel. Këtë po e shfaq edhe gjatë emërimeve në institucionin e tij.