Lëvizja Socialiste për Integrim i kërkon qeverisë marrjen e disa masave për të lehtësuar fermerët përpara se të mbërrijë piku i prodhimit bujqësor.
Letra, e cila mban firmën e kreut të Grupit Parlamentar të LSI-së, Petrit Vasili u drejtohet kryeministrit Rama, ministrit të Financave, Arben Ahmetaj, ministrit të Bujqësisë, Edmond Panariti dhe ministrit të Mirëqënies Sociale, Blendi Klosi.
Vasili ngre shqetësimin e vakuumit ligjor për pagesat në dorë për produktet bujqësore në tregje, një handikap, sipas tij, që duhet të korrigjohet me urgjencë.
LSI propozon një akt normativ që të lejojë fermerët të kryejnë shit-blerje me para në dorë, deri në 100.000 lekë në pikat e grumbullimit dhe të agro-përpunimit.
“Shqipëria nuk parasheh pagesa “cash’ në dorë për shit-blerjen e prodhimeve bujqësore dhe blegtorale. Kjo është kthyer në faktor të fortë pengues për dorëzimin-shitjen e prodhimeve bujqësore nga fermerët në pikat e grumbullimit si dhe ato të agro-përpunimit. Pjesa më e madhe e fermerëve nuk zotërojnë konto bankare dhe janë larg shërbimeve bankare, duke e parë veten padrejtësisht të përjashtuar nga e drejta e shitjes së prodhimeve. Kërkohet zgjidhje urgjente, sepse po afrohet piku i prodhimit dhe pengesat në shitje do të çojnë në kalbje dhe dëmtime të prodhimeve në sera dhe arë dhe humbje të mëdha për fermerët. Duke u nisur nga eksperienca të rajonit, në analogji përshembull me Maqedoninë dhe Kosovën. Ju propozojmë të vlerësohet nga ju që ky problem të rregullohet me akt normativ, e drejta për të kryer shit-blerje me para në dorë deri në 100.000 lekë për fermerët shqiptarë në pikat e grumbullimit dhe të agro-përpunimit.”- thuhet në letrën e LSI-së.
Një tjetër shqetësim, është se u kërkohet padrejtësisht fermerëve pagesa e detyruar e sigurimeve shoqërore për një vit, si parakusht për të aplikuar për skemat e subvencioneve në bujqësi. Sipas Vasilit, kjo i vendos ata në pamundësi paguese, duke i përjashtuar padrejtësisht nga skemat mbështetëse.
LSI propozon që të mos ndryshojë kriteri i deritanishëm i detyrimit të pagesës së sigurimeve vetëm për muajin kur ndodh aplikimi (sigurimi korent).
Tjetër shqetësim për fermerët është edhe mbyllja e shërbimeve doganore në orën 20:00, ndërkohë që maunet me prodhime bujqësore lëvizin shumë përtej këtij orari. LSI propozon shërbim doganor 24 orësh, të paktën për ngarkesat bujqësore.
“Vonesat dëmtojnë cilësinë e prodhimeve bujqësore dhe thyejnë kontratat e dorëzimit në kohë në destinacion, gjë që shoqërohen me penalitete për prodhuesit dhe eksportuesit tanë. Ju propozojmë që të aplikohet shërbimi doganor 24-orësh, të paktën për ngarkesa bujqësore. Njëkohësisht të krijohet një linjë dedikuar për kamionët me prodhime bujqësore (linja e gjelbër doganore).”- thuhet në letrën që Vasili i ka dërguar kryeministrit dhe 3 ministrave që drejtojnë institucionet e linjës.
