Ministri i Mirëqenies Sociale dhe Rinisë, Blendi Klosi ka reaguar për rastin e dhunimi të një fëmije 3 vjeç e gjysmë në Shtëpinë e Foshnjës Durrës, nga kujdestarja e këtij institucioni.
Klosi vlerëson si tejet të rëndë e të patolerueshëm rastin e denoncuar në media, në Shtëpinë e Foshnjës në Durrës. “Ministri i Mirëqenies Sociale dhe Rinisë Blendi Klosi, prej momentit të shfaqjes së pamjeve në media, urdhëroi marrjen e të gjitha masave për zbardhur në mënyrë të plotë ngjarjen dhe ndëshkimin e të gjithë personave përgjegjës. Dhuna e ushtruar ndaj një fëmije në Shtëpinë e Foshnjës Durrës, përbën një shkelje të rëndë të të drejtave themelore të fëmijës, të sanksionuara në Kushtetutë dhe në Ligjin e Mbrojtjes së të Drejtave të Fëmijës. Sikundër përbën shkelje edhe të Standardeve të Qendrës së Përkujdesit dhe e Kodit të Sjelljes së punonjësit në këto institucione”, deklaron MMSR.
Emisioni “Stop” denoncoi dje dhunimin e 3-vjecarit nga kujdestarja e kesaj qendre, i cili ishte me shenja te qarta dhune ne fytyre.
Sipas Klosit, pushimi nga puna nga Bashkia Durrës i punonjëses Dafina Fama që ka shkaktuar dhunën dhe çuarja e saj për ndjekje penale nga policia e prokuroria, janë vetëm hapi i parë drejt zbardhjes së plotë të këtij rasti të rëndë dhe identifikimit i të të gjitha përgjegjësive të drejtueses dhe stafit të këtij institucioni.
Ministri Klosi, urdhëroi menjëherë ngritjen e një grupi kontrolli, i drejtuar nga Nëndrejtoresha e Përgjithshme e Shërbimit Social Shtetëror, i cili po kryen kontroll në këtë Qendër për të analizuar në thellësi rastin e ndodhur të dhunës, për të identifikuar qartë përgjegjësitë, jo vetëm të punonjëses së përfshirë në këtë ngjarje të rëndë, por edhe të stafit të qendrës e drejtueses së saj.
Ministri i është drejtuar Bashkisë Durrës, me kërkesën e largimit gjithashtu të drejtoreshës së Shtëpisë së Foshnjës në Durrës, për përgjegjësinë e menaxhimit dhe drejtimit të stafit, si dhe përgjegjësinë për mirëqenien dhe sigurinë e fëmijëve.
“Nga rasti i dhunës në Shtëpinë e Foshnjës Shkodër, prej korrikut të 2015, MMRS ka marrë masa për parandalimin e rasteve të tilla përmes testimit të punonjësve për njohuritë, si dhe për standardet, ku njëri prej elementeve ka te bëjë me parandalimin e dhunës. Duke dënuar ashpër rastin e dhunës në Shtëpinë e Fëmijës në Durrës, Ministri Blendi Klosi garanton se do të vijojë puna për parandalimin e çdo rasti të ngjashëm dhe rikonfirmon tolerancën zero ndaj çdo keqtrajtimi apo abuzimi të fëmijëve, veçanërisht atyre në Qendrat e përkujdesit”, përfundon reagimi i MMSR.
