Kreu i opozitës, Lulzim Basha ka deklaruar se do i kthejë sot përgjigje kryeministrit Rama për ftesën e tij për dialog dhe ngritjen e një forumi të përbashkët pa praninë e ndërkombëtarëve.
Basha tha se vendi ka kaluar kriza të shumta kushtetuese dhe duhen ndërhyrje në themelet e kësaj republike, duke nënkuptuar kushtetutën.
“Qytetarët janë sovranët, as Leskaj, as Suli, as Kokëdhima. Nuk ka mundësi maxhoranca të mos plotësojë detyrimin kushtetues. Ose do plotësojë detyrimin kushtetues ose do futet vendi në anomalitet të thellë. Fakti që ndodhemi në një krizë kushtetuese të thellë, duhet që vendit t’i hapet perspektiva… Institucionet po dështojnë herë pas here në përmbushjen e detyrave kushtetuese. Letrën do ta lexoj dhe do t’i përgjigjem. Në këtë kuptim, gjëja e parë që duhet të ndodh ndalimi i kësaj situate paligjshmërie. Koha ka ardhur të shqyrtojmë edhe njëherë themelet e kësaj republike që të shmangim kriza sërish në të ardhmen”, deklaroi Basha.
Sigurisht, për Bashën ‘kjo kërkon dialog për të cilën PD dhe unë kemi qenë të hapur, pavarësisht gjuhës vulgare’. “Unë jam njeri me masë durimi dhe largpamësie të cilësisë shqiptare dhe europiane dhe nuk ia mbyll kurrë derën dialogut”, tha Basha. I pyetur nëse përgjigjja do të kthehet sot, Basha tha: Sigurisht që po!
