Partia Socialiste e cilësoi si një refren të opozitës ligjin për dekriminalizimin, duke e lidhur me ngjarjen e fundit të armës së deputetit demokrat Gent Strazimiri.
Në një dalje publike, deputetja Blerina Gjylameti u shpreh se opozita po mundohet të mbulojë dhe justifikoj aktin kriminal të Strazimirit.
“Të justifikosh një deputet të armatosur me pistoletë pa leje nuk është e lehtë. Sikundërse, ndryshe nga Partia Demokratike, ne nuk fajësojmë Lulzim Bashën për lajthitjen e deputetit të tij. Nuk është fajtor Lulzim Basha, përse një zyrtar i lartë i Partisë Demokratike një ditë të bukur vendos të protestojë me armë kundër ndërtimit të një kopshti lodrash për fëmijë. Por është faji i Lulzim Bashës dhe Partisë Demokratike që ende në këto momente, më shumë se 24 orë pas ngjarjes tronditëse, ende nuk kanë gjetur kurajon për të dënuar atë akt.”- u shpreh Gjylameti.
Për deputeten socialiste, forca e saj politike ndryshon nga kundërshtarët në standardin e vendosur për respektimin e ligjit.
“Në Partinë Socialiste kemi vendosur një standard të lartë: nëse shkel ligjin, duhet të përballesh me ligjin. Nuk ka rëndësi nëse je deputet, apo ministër. Përpara ligjit të gjithë janë të barabartë. Ishte kjo arsyeja pse për një rast të ngjashëm, Partia Socialiste e përjashtoi deputetin nga radhët e saj, i hoqi imunitetin dhe e dorëzoi tek drejtësia.”- shtoi më tej Gjylameti.
