Deputetja e Partisë për Drejtësi, Integrim dhe Unitet, Mesila Doda kërkon nga Ministri i Brendshëm Saimir Tahiri që të publikojë listën e të gjithë deputetëve që posedojnë armë.
Reagimi vjen pasi deputeti Genti Strazimiri u fotografua me një pistoletë gjatë protestës tek Parku i Liqenit.
Sipas zonjës Doda, të gjithë deputetët duhet të trajtohen njësoj.
“Ministër, meqë ka 24 orë që flitet veç për armët e deputetëve po pres që të silleni si shtetarë të vërtetë dhe të botoni të gjithë emrat, nga i pari tek i fundit, pa dallim, të të gjithë deputetëve, të gjitha krahëve që disponojnë arme. Me këtë nënvizoj qe deputetet e forcës suaj politike, duhet te trajtohen njësoj si gjithë deputetet e tjerë dhe të bëhen publike rastet e shkeljes. Ligji duhet të respektohet dhe te jete i njëjtë për gjithë qytetaret, ky është rast i mirë te kuptohet dallimi midis luftëtarëve dhe parlamentarëve.”- shkruan Doda e cila pak kohë më parë ishte deputete e Partisë Demokratike.
Mbetet për t’u parë nëse do të plotësohet kërkesa e Mesila Dodës, meqënëse tani është në koalicion me qeverinë.
