Ministri i Drejtësisë Ylli Manjani ka denoncuar anomalitë në sistemin e gjyqësorit në Shqipëri. Duke folur në Konferencën Gjyqësore Kombëtare, Manjani ka sulmuar ata gjyqtarë që shkelin ligjin përmes vendimeve të paarsyetura apo vonesave në shpalljen e vendimeve gjyqësore.
Duke folur për këtë kategori gjyqtarësh, Manjani tha se një pjesë e tyre po punon si për ditë të fundit, duke nënkuptuar këtu korrupsionin në sistemin gjyqësor.
“Jam gati të identifikoj grupe të caktuara gjykuese brenda shkallës së parë edhe ua them, por jo këtu, se kush do të jetë trupa gjyqësore që do ta gjykojë në Apel. Ka një tendencë se po punohet si për ditën e fundit dhe kjo nuk është e pranueshme. Janë ata që e mendojnë veten të larguar nga reforma në drejtësi. Shpallja e vendimeve në mënyrë të paarsyetuar është shtuar këto kohë”, u shpreh Manjani.
Ministri i Drejtësisë kërkoi nga gjyqtarët që të jenë të përgjegjëshëm në detyrën e tyre, pavarësisht se po punohet për reformën në drejtësi. Kjo nuk duhet të ndikojë në braktisjen e dhe neglizhencën e punës, tha ministri, deri në realizimin e reformës.
“Rreforma në drejtësi do të bëhet, kjo nuk diskutohet fare. Nuk mund të presim që të bëhet një gjë e madhe sepse ndërkohë jeta po jetohet, në sallën e gjyqeve vazhdohet puna dhe nuk mund që për hir të reformës t’u shesim njerëzve që c’ka do ndodhë në të ardhmen dhe tani t’u shesim dicka që po rëshqet nga shërbimi që nuk besohet nga njerëzit.
Përditë në zyrën time vijnë ankesa për shërbimin e munguar në gjyqësor. Nuk ka qeverisje të mirë pa drejtësi. Kjo është cka po na ndodh. Vëmë re disa tendenca shthurrje në punën e përditshme të gjyqësorit. Janë shtuar raportet e cuditshme mjekësore mes jush. Raportet fiktive është një fenomen që nuk i ka hije një zyrtari”, deklaroi ministri i Drejtësiëë Ylli Manjani në Konferencën Gjyqësore Kombëtare.
