Nga Jetmir Olldashi
Tirana është e mbushur me postblloqe dhe polic që të japin përshtypjen e një shteti policesk. Ndërsa nesër me një plan masash të miratuar nga policia e shtetit pritet që specialet të mësyjnë mbi një grup aktivistësh, qytetarë të cilët po protestojnë kundër masakrës së fundit, që po ndërmerret ndaj pyllit të liqenit artificial. Vetëm dy netë më parë në mes Tiranës u vra një ish-efektiv policie sipas një stili mafioz.
Ndërsa ngjarje të tjera të rënda janë shënuar në 48 orët e fundit. Duket sikur drejtuesit e Ministrisë së Brendshme i lejojnë vetë ngjarjet e rënda dhe ditë më pas shpallin shtet rrethimin. Ky është reagimi “Taliban”, ku terrorizimi dhe trembja e civilëve shërben për të arritur qëllimet e errëta të kastës të lidhur me lulëkuqen e fushave të Afganistanit.
Mesditën e 19 Marsit aktivistët e organizatave qytetare do tentojnë të çajnë rrethimin e telave, rrjetave dhe policive bashkiake dhe gjithë llojet e tjera të Ministrisë së Brendshme. Flitet se Bashkia e Erjonit dhe ministria e Saimirit do angazhojnë më shumë se 1 mijë forca policore për të goditur taksapaguesit dhe qytetarët e kësaj palaço republike. Nuk dihet nëse do tia dalin dhe a ka mbetur sensibilitet qytetar në një qytet të mbushur me beton dhe qytetar të betonizuar.
E sigurt është që policia do ti gjakosë sërish nesër siç ka bërë që nga krijimi i shtetit shqiptar ku policia është përdorur si mish për top dhe kundër çdokujt që është kundër fuqisë në pushtet. Sidoqoftë pavarësisht se të gjitha fuqitë në pushtet e kanë pasur me vete dhe e kanë përdorur si mos më keq policinë sërish fundi i tyre ka qenë i njëjtë.
Edhe nesër ndoshta do ketë të gjakosur, të rrahur të shoqëruar e të arrestuar por do mbetet dikush në këmbë për tu bërë thirrje të tjerëve të shkojnë aty dhe të rrëzojnë tiranin e oligarkëve dhe Saimirin e policëve.
