Mbi 1200 efektivë të policisë do të përfshihen nesër kundër protestuesve. Burime nga Drejtoria e Qarkut Tiranë thonë se kanë informacione se protesta do të jetë e dhunshme dhe me përplasje nga palët. Policia thotë se të rinjtë pranë parkut janë nën survejim dhe kanë plane për të sulmuar rrethimin e plotë të parkut.
Ndërkohë, Policia Bashkiake do të vazhdojë ruajtjen me turne të pjesës së parkut të lodrave. Momentalisht ka mbërritur hekuri dhe pritet hedhja e betonit nesër çka do të sjell përplasjen e madhe. Burime nga aktivistët thanë se ata do e pushtojnë me çdo çmim hapësirën e rrethuar. Forcat e ndërhyrjes së shpejtë do zbarkojnë atje për të mbështetur Policinë e Rendit.
Burime konfirmojnë se pasditen e sotme nga shoqëria civile u bë një mbledhje ku do të përcaktojnë edhe ata strategjinë që do të përdorin në protestën e paralajmëruar ditën e nesërme. Në një komunikim me ta mësohet se në orën 11.00 do të mblidhen para Bashkisë e më pas do të marshojnë drejt Parkut të Liqenit.
Pas dhunës fizike të ushtruar pak ditë më parë ndaj 5 aktivistëve të shoqërisë civile nga punëtorët e firmës që po ndërton këndin e lojërave në sy të policisë, duket se është shtuar intensiteti i vullnetit nga shoqëria civile për të ndaluar betonizimin e Parkut të Liqenit. Nisur nga këto fakte pritet që ditën e nesërme në orën 11.00 protesta do të ketë dhe shfaqje dhune.
Madje shoqëria civile ka paralajmëruar të gjithë qytetarët nëpërmjet rrjeteve të ndryshme sociale që të bëhen pjesë e tyre për të ndalur ndërtimin e këndit të lojërave tek Parku i Liqenit.
Thirrja e shoqërisë civile:
“Të ndërtojmë një ditë solidariteti…të vëmë këtë foton “cover” nëpër profilet tona, me shumë do ta shohin, më shumë do mobilizohen, më shumë do solidarizohemi…”
