Dy shtete, Maqedonia dhe Bullgaria po marrin masa për të kontrolluar kufirin e tyre si nga toka ashtu edhe nga qielli për bllokimin e fluksit të refugjatëve. Sipas shërbimit të Qeverisë bullgare, ka qenë një bisedë telefonike mes kryeministrit bullgar Borko Borisov dhe presidentit të Maqedonisë Gjorge Ivanov që kanë zbuluar masat e reja për përforcimin e kontrollit të kufirit.
Të dy bashkëbiseduesit kanë folur për problemin me refugjatët dhe mundësitë për ndërprerje të kanaleve për transportin e tyre ilegal përmes kufirit të përbashkët.
Borisov ka shfaqur brengë për gjendjet në Ballkanin Perëndimor në kontekst të krizës migruese dhe ka paralajmëruar se do të dërgohet ndihmë humanitare për refugjatët në Maqedoni, njëjtë sikur që paraprakisht Qeveria bullgare ka dërguar në Idomeni, Greqi.
Kryeministri bullgar, sipas kumtesës, ka theksuar se kontrolli efektiv në kufijtë e brendshëm të Bashkimit Evropian, të cilat nuk zbatohen vetëm në vendet e zonës së Shengenit, është me rëndësi prioritar për ballafaqim me migrimin.
Borisov ka potencuar se është i domosdoshëm solidariteti dhe koordinimi mes të gjithë anëtarëve të Unionit për zgjidhjen e problemit, ndërsa përkrahje më të madhe duhet të japin ata nga të cilët për shkak të pozitës gjeografike, pritet të ndërmarrin përgjegjësi më të madhe për mbrojtjen e kufijve.
