Kryeministri Edi Rama shfrytëzoi aktivitetin për anëtarësimet e reja në Partinë Socialiste për të shënjestuar sërish opozitën.
Gjatë fjalës së tij, Rama deklaroi se zgjedhjet e ardhshme do t’i fitojë jo vetëm për shkak të reformave të ndërmarra por dhe sepse në Shqipëri nuk ka një opozitë por dy qeveri, njëra që ka rënë nga kali dhe tjetra që i ka hyrë detit në këmbë.
Nga Pallati i Sportit “Asllan Rusi” në kryeqytet, kryeministri Edi Rama u ndal edhe tek reforma në drejtësi, duke theksuar se mazhoranca ishte e qetë për këtë reformë, ndërsa shtoi se opozita do të vinte ta votonte patjetër atë, pavarësisht varkave që do të bënte nga Tirana në Venecia dhe nga Venecia në Tiranë.
“Sado ata të qeverisë së vjetër të rrotullohen, e të rrotullohen, sado varka të marrin nga Venecia për Tiranë, e nga Tirana për Venecia, e futu në ujë e nxirr kokën, nga do të rrotullohen do të vijnë o do të votojnë reformën në drejtësi, ndryshe ato 1 milion shuplaka të dy viteve më parë do t’u duken përkëdhelje në raport me ato të tjerat që do të marrin në zgjedhjet e ardhshme.”– u shpreh Rama.
