Fill pas përfundimit të mbledhjes së Grupit Parlamentar të Partisë Socialiste, deputeti rebel Ben Blushi i është përgjigjur zërave për një mundësi për zgjedhje të parakohshme në vend, nëse nuk arrihet konsensusi për reformën në drejtësi.
‘Për çfarë do të shërbenin zgjedhjet e parakohshme?’, tha Blushi. Nga ana tjetër ai e cilësoi mundësinë e zgjedhjeve të parakohshme ‘lojë me peta brenda koalicionit’, ndërsa theksoi se nëse shkohet drejt kësaj rruge, nënkupton prishjen e koalicionit.
“Propozuan zgjedhje të parakohshme, sepse ata sot atë përfundim mund të kishin. Nëse shkojmë në zgjedhje të parakohshme pa koalicionin që kemi. Nëse zgjedhjet e parakohshme janë për të prishur koalicionin?! Kush do të çojë PS në opozitë, kërkon zgjedhje. Unë se marrë seriozisht. Nëse shkojmë në zgjedhje të parakohshme, çfarë garancie ka që parlamenti i ka votat për reformën? Nuk po jetojmë në ditët më të lumtura për ekonominë. Zgjedhjet e parakohshme trembin ekonominë dhe investitorët.”, tha Blushi.
Deputeti i Partisë Socialiste, Pandeli Majko propozoi pak ditë më parë se në rast se mazhoranca dhe opozita nuk do të arrinin të gjenin konsensusin për realizimin e reformës në sistemin e drejtësisë, atëherë sipas tij vendi duhet të shkojë drejt zgjedhjeve të parakohshme.
(Boldnews)
