Kryeministri Edi Rama teksa zhvilloi aktivitetin për anëtarësimet në qytetin e Shkodrës, nuk e ka lëshuar podiumin, për t’i dhënë fjalën deputetes Mimoza Hafizi. Kjo e fundit, e njohur si një nga kritiket kundër Ramës, tentoi t’i afrohej podiumit, por kryeministri e orientoi të përdorë mikrofonin.
Duke iu drejtuar anëtarëve të rinj të partisë socialiste, Hafizi shënjestroi kryeministrin Rama për zgjedhjet brenda kësaj force politike.
“Dëshiroj shumë që të keni ardhur në PS për të gjetur një strukturë demokratike, për të gjetur një strukturë ku respektohen rregullat dhe normat, për të gjetur një strukturë ku secili prej jush ka të drejtë të zgjedhë dhe të zgjidhet. Të zgjedhë më të mirin, më të vlefshmin duke filluar nga kryetari i organizatës deri tek kryetari i partisë. Shpresoj që ju vini në PS për të ndikuar për një qeverisje më të mirë kundër korrupsionit, kundër antishtetit, për një kolegjialitet në PS, për respekt. Jam e sigurt që ju do ti kërkoni ti keni këto në PS dhe nëse ju kërkoni të keni një Shqipëri më të mirë përmes një partie më të mirë, unë me gjithë zemër ju them: “Ardhtë sa më parë dita që kjo parti dhe fati i saj të jetë në dorën tuaj”- u shpreh deputetja shkodrane Mimoza Hafizi.
