Donald Trump bëri thirrje për arrestimin e protestuesve që shqetësuan tubimet e tij, pasi ai u detyrua të anulonte angazhimet e parashikuara elektorale. Komentet e tij erdhën pas një dite të trazuar në fushatë, gjatë së cilës një demonstrues tentoi të hipte në podiumin ku po fliste Trump.
Duke iu drejtuar policisë, Trump ka thwnw se do të ngrejë paditë që duhen, në mënyrë që autoritetet të veprojnë dhe të arrestojnë ata që janë fajtorë për dhunën. Sipas tij, nëse fajtorët arrestohen, ata do të bëhen shembull dhe nuk do të ketë më probleme të tilla.
Trump ka akuzuar mbështetësit e Bernie Sanders, që dëmtuan tubimin e tij në Chicago. “Disa prej tyre përfaqësojnë Bernien, mikun tonë komunist”, ka deklaruar Trump.
Por senatori Sanders, që garon për nominimin demokrat, i hodhi poshtë këto akuza duke thënë se, Trump përpiqet të ngjallë tensione.
Ndërkohë, rivalët e Trump brenda partisë kanë lënë të kuptohet se nuk do ta mbështesin atë, edhe nëse fiton kandidaturën republikane.
Ted Cruz, Marko Rubio dhe John Kasich kanë deklaruar para mediave se Trump po përdor një retorikë shumë provokuese dhe kjo, bashkë me ngjarjet e fundit, e b ëjnë gjithnjë e më të vështirë mbështetjen e tij.
Kandidatët e tjerë republikanë po përdorin tensionimin e situatës për të fajësuar rivalin e tyre Trump, me shpresën se ky i fundit do të humbasë pikë dhe do të dalë jashtë garës presidenciale.
(Boldnews)
