E keni pyetur ndonjëherë veten përse disa nga miqtë tuaj postojnë në mënyrë të vazhdueshme në Facebook? Përgjigja, sipas shkencëtarëve, qëndron tek truri i tyre, që është ndryshe nga të tjerët.
Studiues të Freie Universität në Berlin dhe Instituti Max Planck, pasi analizuan trurin e 35 personave, besojnë se, ndarja e thuajse gjithçkaje në internet, lidhet me aktivitetin e madh në atë pjesë të trurit të njeriut, përgjegjëse për vetënjohjen dhe vetëzbulimin.
Të gjithë pjesëmarrësit plotësuan një formular për të përcaktuar sa shpesh postonin foto të vetes, përditësonin statusin dhe informacionet e profilit të tyre. Shkencëtarët më pas morën informacione nëpërmjet skanimit të trurit të tyre, teksa ata ishin të lirë të mendonin.
Gjatë analizimit të rezultateve, ata vunë re se njerëzit që tentonin të ndanin më shumë informacion rreth vetes, kishin lidhje me të shumta dhe më të forta mes pjesës së trurit e përgjegjshme për mendimet rreth vetes dhe asaj pjese që i përgjigjet ndarjes së informacioneve.
Sipas ekspertëve, ndonëse selfiet e vazhdueshme konsiderohen si një simptomë që tregon obsesion me mediat sociale, ky studim tregon se në fakt ka të bëjë me këtë pjesë të trurit.
Duke marrë parasysh faktin se truri është një organ tepër kompleks, këto të dhëna nuk janë definitive, megjithatë, shkencëtarët thonë se janë një fillim i mbarë për studime të mëtejshme, të lidhjes mes dëshirës për të ndarë gjëra nga vetja dhe median sociale.
