Dy lojtarët që sot luajnë me Partizanin, Idriz Batha dhe Mentor Mazrekaj, sezonin e ardhshëm futbollistik mund të veshin fanellën e Skënderbeut. Ky është lajmi më i bujshëm që është zbuluar ditën e djeshme nga burime pranë drejtuesve bardhekuq.
Presidenti Ardjan Takaj ka filluar qysh tani të mendojë për vitin e ardhshëm duke piketuar lojtarët më të mirë në kampionatin shqiptar. Idriz Batha dhe Mentor Mazrekaj janë dy nga “objektivat” e momentit dhe të njëjtat burime bëjnë me dije se “bosi” i kampionëve ka gati edhe parakontratat me këta futbollistë në mënyrë që të sigurojë sa më parë shërbimet e tyre. Jo më kot, një lajm i tillë zbulohet vetëm pak ditë përpara ndeshjes me Partizanin. Kjo për faktin se Takaj ka treguar gjithmonë se, ata që ka synuar i ka sjellë te Skënderbeu.
Në fakt, kjo dyshe ka qenë e piketuar edhe më parë nga ana e kampionëve. Por Batha dhe Mazrekaj kanë qenë në kontratë me Partizanin dhe Skënderbeu ka ndjekur në të gjitha blerjet, një praktikë pune, duke mos iu afruar ndaj asnjë lojtari që është nën kontratë. Ndoshta, pas ndeshjes me Partizanin ditën e hënë, mund të kemi firmën në parakontratat me këta dy futbollistë. Por pritet që Batha dhe Mazrekaj të mos jenë të vetmit “të kuq” që do t’i bashkohen Skënderbeut sezonin e ardhshëm. Arbnor Fejzullahu është një tjetër lojtar i Partizanit që është prej kohësh në fokusin e kampionëve, por nuk ka mundur të arrihet akordi, pasi edhe ky i fundit ka qenë nën kontratë.
Fejzullahu është një “dashuri e vjetër” e Skënderbeut. Por, për momentin flitet vetëm për Bathën dhe Mazrekajn për një parakontratë të mundshme me kampionët. Në ditët në vazhdim do të jepen detaje të tjera në lidhje me marrëveshjet e mundshme të tyre me korçarët. Gjithsesi ky lajm duket më shumë se i sigurt, aq më tepër që del nga burime pranë presidentit Ardjan Takaj. Madje është më shumë se i besueshëm edhe për arsyen se, në radhët e kampionëve ka shumë lojtarë të huaj dhe për sezonin e ardhshëm pritet që të ketë afrime vetëm të futbollistëve të tregut vendas. Batha dhe Mazrekaj janë dyshja ideale, që kanë gjasa të veshin fanellën e Skënderbeut përpara ndeshjeve europiane, një lajm që absolutisht ka kënaqur pa masë edhe tifozërinë korçare.
