Vdekja e ish-bashkëpunëtorit më të ngushtë të Vladimir Putin dhe ish-ministrit rus të Medias, Mikhail Lesin, është përfshirë nga një mister, kjo pasi në rezultatet e ekspertizës mjekësore shkruhet se ai kishte dëmtime të rënda në kokë.
Mikhail Lesin, njeriu më me influencë në korridoret e pushtetit në Rusi dhe një prej ndihmësve më të afërt të Putinit, që u gjet i pajetë vitin e kaluar në Shtetet e Bashkuara, nuk ndërroi jetë nga infarkti, por nga disa goditje në kokë dhe trup.
Shefi i Mjekësisë Ligjore në Uashington DC shpjegoi se “Mikhail Lesin, kishte plagë në qafë, kraharor, krahë dhe këmbë”, por pa dhënë detaje të tjera. Sipas zëdhënësit të policisë, i cituar nga “Washington Post”, “rasti Lesin” mbetet nën hetim. Ai nuk pranoi të thoshte nëse ekzaminimi mjeko-ligjor pas vdekjes fakton kryerjen e një krimi.
Zëdhënësja e Ministrisë së Jashtme ruse, Maria Zakarova tha se Moska është në pritje të “qartësimeve” nga Uashingtoni si dhe të dhënave të reja për ecurinë e hetimeve.
57-vjeçari u gjet i vdekur në dhomën e hotelit Dupont Circle në Uashington, në nëntor të vitit 2015. Lesin ka mbajtur postin e këshilltarit për Median gjatë viteve 2004-2009 dhe ndihmoi në hapjen e “Russia Today” , ka qenë Ministër për Median si dhe kreu i “Gazprom-Media Grup”, nga i cili dha dorëheqjen në vitin 2014.
Pikërisht në këtë vit, senatori i Misisipit, Roxher Uiker kërkoi të hetohej për pronën e Lesin në Los Anxheles, në vlerën e 28 milionë dollarëve ku ai u zhvendos me familjen.
Ndërkohë, pas këtij lajmi, ka reaguar zëdhënësja e Ministrisë së Jashtme ruse, Maria Zakharova, e cila përmes një postimi në llogarinë e saj në “Facebook” ka bërë të ditur se Rusia i ka kërkuar disa herë Uashingtonit për rezultatet e hetimeve, por asnjëherë nuk kanë marrë përgjigje.
“Ne ende po presim një përgjigje zyrtare në lidhje me hetimin. Për muaj me radhë pala amerikane ka refuzuar bashkëpunimin duke mos dhënë asnjë detaj”, shkroi Zakharova.
(Boldnews)
