Everton ka eliminuar Chelsea dhe është kualifikuar në gjysmëfinalen e Kupës së Anglisë. Takimi është fituar me rezultatin 2-0 nga lojtarët e Martinez, që kanë arritur të marrin rezultatin maksimal me sforcimin minimal. Gjithçka është vendosur në minutat e fundit të ndeshjes, kur Romelu Lukaku ka gjetur dy herë rrugën e rrjetës dhe i ka dhënë fund ëndrrës së Chelsea për të fituar një trofe në këtë sezon zhgënjyes. Pjesa e parë është mbyllur në barazim pa gola, ndërsa rastet kanë munguar nga të dyja ekipet, pavarësisht se portieri i vendasve Robles ka qenë ai që ka pasur më shumë punë në 45 minutat e para. Gjakrat janë nxehur në minutën e 9-të kur Diego Costa është rrethuar nga lojtarët e zemëruar të Everton për shkak se sulmuesi spanjoll ka goditur me bërryl mesfushorin Gareth Barry. Një veprim ky që është ndëshkuar me karton të verdhë nga arbitri i takimit. Pjesa e dytë ka filluar me të njëjtin ritëm siç ka përfunduar e para.
Në minutën e 58-të kanë qenë miqtë që kanë shkuar shumë afër golit të avantazhit, teksa goditja diagonale e Diego Costa, pasi ky i fundit ka arritur të shmangë edhe portierin, ka kaluar gjithë pasqyrën e portës, pa kaluar vijën fatale. Momenti vendimtar i ndeshjes ka ardhur në minutën e 77-të kur Romelu Lukaku ka realizuar golin që i ka dhuruar fitoren dhe kualifikimin në gjysmëfinale Everton-it, duke mposhtur portierin Courtois pasi ka shmangur katër mbrojtës të Chelsea.
Pesë minuta më vonë, sulmuesi belg ka dyfishuar avantazhin e vendasve dhe ka mbyllur ndeshjen me një goditje të saktë diagonale, ndërsa topi ka përfunduar poshtë këmbëve të portierit të Chelsea. Në minutën e 85-të gjakrat janë nxehur përsëri dhe përsëri shkaku ka qenë Diego Costa, i cili është munduar të kafshojë në qafë mesfushorin e Everton Barry. Veprim ky që i ka kushtuar kartonin e kuq sulmuesit. Në minutën e 87-të është rikthyer barazia e lojtarëve në fushë pasi Barry ka marrë kartonin e tij të dytë të verdhë. Takimi është mbyllur 2-0 dhe ndeshjet çerekfinale të Kupës së Anglisë do të vazhdojnë nesër me Arsenal-Watford dhe Manchester United-West Ham.
Everton-Chelsea 2-0 Shënues: Lukaku 77’, 82’ Everton: Robles, Coleman, Jagielka, Funes Mori, Baines, McCarthy, Barry, Lennon (Stones 89’), Barkley (Besic 92’), Cleverley, Lukaku (Niasse 93′). Trajner: Martinez. Chelsea: Courtois, Azpilicueta, Cahill, Ivanovic, Kenedy (Terry 86’), Mikel, Matic (Remy 82’), Willian (Oscar 73’), Fabregas, Pedro, Diego Costa. Trajner: Hiddink. Gjyqtar: Oliver Kartonë të verdhë: Jagielka/Costa, Fabregas Kartonë të kuq: Barry/Costa
