Nga 15 marsi, rreth 20 policë në dispozicion në rast të fluksit, pas mbylljes së rrugës Ballkanike. Alarmi nga Greqia: Emergjenca në kulm, vendet anëtare të pranojnë vendosjen.
Nga 15 marsi, 20 trupa të policisë kufitare italiane do të jenë në Shqipëri për të përforcuar kufijtë e vendit, shkruan TGCom. Ardhja e tyre bëhet me kërkesë të autoriteteve në Tiranë, në kuadër të një bashkëpunimi të përforcuar mes Italisë dhe Shqipërisë për të përballuar çështjen e parandalimit të fenomenit migrator dhe menaxhimin e saj, në rast të mbërritjes së ndonjë fluksi, pas mbylljes së rrugës Ballkanike.
Turqia siguron se do të respektojë marrëveshjen me BE-në. Do të jetë Tirana që do të vendosë në cilët kufij do t’i dislokojë policët italianë, citohen burime nga Brukseli.
Të enjten si ministri i Brendshëm italian, Angelino Alfano ashtu edhe ministrja e Mbrojtjes, Roberta Pinotti kishin nënvizuar rëndësinë e një partnershipi me Shqipërinë për të menaxhuar një fluks të mundshëm të emigrantëve drejt brigjeve italiane, përmes Adriatikut, si pasojë e mbylljes së të ashtuquajturës rrugë ballkanike.
Shqipëria dhe Turqia “do të jenë kyçi i strategjisë për të luftuar emigracionin”, tha në mënyrë të veçantë Alfano, duke shtuar se “ne duhet të bindim Turqinë për të na ndihmuar, që ajo vetë të mos i lejojë emigrantët të dalin dhe kështu të mos vijnë drejt veriut; ndërsa “Shqipëria, duhet të monitorojë më mirë kufijtë dhe terrorizmin.”
“Po punojmë me Shqipërinë në të gjitha nivelet për të evituar që të hapet një tjetër front”, ka thënë ministrja Pinotti.
Sipas paralajmërimit të saj, “rreziku për një fluks emigrantësh ekziston por Shqipëria është një vend mik dhe jemi duke punuar që kjo të mos ndodh”, ka përfunduar ministrja italiane e mbrojtjes, duke saktësuar që për momentin nuk ka të dhëna për t’i bërë publike por ‘vetëm një shqetësim’.
Ndërkohë Greqia lëshon një tjetër alarm: Kriza humanitare ka arritur kulmin e saj. Shtetet anëtare të BE-së të pranojnë me urgjencë vendosjen e emigrantëve. Është koha për të vepruar”, thekson komisioneri europian Dimitris Avramopoulos në Twitter.
(Boldnews)
