Supersfida e titullit / Partizani-Skënderbeu, ja çmimet e biletave

Të dielën e kësaj jave dhe të hënën e javës që vjen do të luhet java e 26-të e kampionatit kombëtar, Kategoria Superiore (shiko grafikun ne foto). Duke qenë se u luajt në mesjavë, pra dje, ka pasur një spostim me 24 orë, për t’iu dhënë mundësinë skuadrave të rikuperojnë forcat dhe energjitë. Pak më tepër kohë në dispozicion për këtë do të ketë Skënderbeu dhe Partizani, dy pretendentët për titull, të cilët i ndajnë katër pikë nga njëri-tjetri. E hëna e javës që vjen do të sjellë përplasjen direkte mes tyre, në “Qemal Stafa”, ndeshja e fazës së tretë, teksa dy të parat kanë prodhuar ekuilibër të plotë: një fitore e Partizanit, 2-1, një fitore e Skënderbeut, 1-0, në fushat respektive.
Tani është e treta e vërteta, një duel që do të qartësojë më shumë betejën për titull. Nëse fitojnë të kuqtë, diferenca zvogëlohet në vetëm një pikë, nëse suksesi u takon juglundorëve, atëherë ata mund të nisin festimet për titullin e 6-të. Barazimi, kuptohet, u shkon për shtat të besuarve të Mirel Josës, sepse ruajnë pozitat aktuale në klasifikim. Duke pasur tërë këtë rëndësi, natyrshëm që edhe interesi i publikut është i madh. Tifozëritë e të dyja skuadrave nuk duan ta humbasin spektaklin që kanë mundësi të dhurojnë këto dy skuadra. Mirëpo, shkuarja në “Qemal Stafa”, nis nga sigurimi i një bilete.
Klubi i kuq, organizator i kësaj supersfide, nuk ka vonuar, por ka bërë njoftimin përkatës në këtë drejtim, duke i dhënë mundësinë gjithkujt të sigurojë biletën që dëshiron dhe vendin në shkallët e “Qemal Stafës”, aty ku do të diskutohet një copëz titulli të hënën, prej orës 19:00, nën dritën e prozhektorëve. “Klubi ju bën me dije çmimet e biletave për takimin Partizani-Skënderbeu. Sipas tribunave respective, ato do të jenë: Biletat në tribunat A dhe B do të jenë të diferencuara, në 2 sektorë, me çmimet respektive: 1500 lekë (të rinj) dhe 1000 lekë. Biletat në tribunat D2, D3 dhe E do të kushtojnë nga 300 lekë.
Hyrja për femrat do të jetë falas në sektorët e tribunave D2 dhe D3. Tifozëria e kuqe do të akomodohet në sektorët e tribunave B, D2 dhe D3. Tifozëria mike, nga Korça, do të ketë në dispozicion tribunat A dhe E. Biletat do të mund t’i siguroni nga dita e premte, prej orës 09:00, pranë pikës të shitjes së stadiumit “Qemal Stafa”. Të hënën, ora 19:00, ndeshja direkte për titull. Vetëm nëpërmjet vazhdimësisë së fitoreve dhe mbështetjes masive në shkallët e stadiumit do t’ia dalim!” – shkruhet në faqen zyrtare të Partizanit.