Qeveria ka shkurtuar me gati dy javë afatet për pagesën e tarifës së shërbimit. Tarifa e shërbimit prej 8 mijë lekësh tani do të paguhet jo për 45 ditë por për 30 ditë. Kjo vlen për legalizimin e banesave të dyta, godina strehimi dhe biznesi.
Ndonëse me këtë synohet përshpejtimi i ritmeve të punës nga ALUIZNI, ajo që ndodh është ngushtimi i lakut për këto familje, të cilat, krahas faturës për truallin, duhet të paguajnë edhe këtë taksë. Në vendimin e djeshëm specifikohet po ashtu se familjet do të njoftohen me anë të postës për pagesën.
“Pagesa e tarifës së shërbimit të kryhet brenda 30 ditëve nga data e njoftimit me shkrim të ALUIZNI-t. Për ndërtimet pa leje, njoftimi për pagesën e tarifës së shërbimit i dërgohet subjektit në rrugë postare ose i jepet në dorëzim menjëherë pas kualifikimit të ndërtimit për legalizim”.
Vlen të theksohet se në rast se kjo tarifë nuk likuidohet brenda afatit kohor të vendosur, atëherë Agjencia e Legalizimit ka detyrimin për dërgimin e dosjes në Hipotekë ku do të nisin edhe procedurat e regjistrimit. Duhet thënë që në këto raste praktika e regjistrimit nuk është e njëjtë, ajo bëhet në një regjistër të veçantë. “Në rast mospagimi të tarifës, ALUIZNI, pas miratimit të lejes së legalizimit, e dërgon atë për regjistrim me hipotekë ligjore mbi ndërtimin”.
Barra hipotekore hiqet në momentin e shlyerjes së detyrimit financiar që familjet kanë në ngarkim. Dy kategoritë e mësipërme, përkatësisht objektet me destinacion socialekonomik dhe objektet e dyta preken edhe nga çmimet e reja të trojeve, që këtë vit kanë njohur rritje në disa zona.
Për godinat me funksion të përzier, pra, që shfrytëzohen për qëllime strehimi dhe biznesi njëherazi, një pjesë e tokës do të paguhet me çmim tregu dhe pjesa tjetër me gjysmën e vlerës së përcaktuar. Ndërsa për shtëpitë e dyta nuk aplikohen reduktime
